काठमाडौं- दीपेन्द्रसिंह ऐरीको उत्कृष्ट बलिङको मद्दतमा नेपाल पुलिस क्लबले प्रदेश–१ लाई ७५ रनले पराजित गरेको छ । प्रधानमन्त्री कप एकदिवसीय क्रिकेट प्रतियोगितामा प्रदेश-१ लाई पराजित गरेको पुलिस सेमिफाइनल नजिक पुगेको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा बुधबार भएको खेलमा प्रदेश-१, ३८ ओभर ३ बलमा सबै विकेट गुमाएर ११० रनमा समेटियो ।

टस जितेर पहिले ब्याटिङ गरेको पुलिसले १८६ रनको लक्ष्य प्रस्तुत गरेको थियो । प्रदेश-१ का लागि सन्नी पुनले २७, मनिस थापाले १९ र दिपेश कँडेलले १५ रन बनाउनु बाहेक अन्य ब्याट्सम्यानले दोहोर अंक बनाउन सकेनन् ।

प्रदेश-१ विरुद्ध राष्ट्रिय टोलीका अलराउण्डर दीपेन्द्रसिंह ऐरीले ५ विकेट लिए । उनले १० ओभर पूरा बलिङ गर्दै ४ मेडन ओभरसहित २६ रन खर्चेर ५ विकेट लिएका हुन् । यस्तै, ललितनारायण राजवंशीले ३ विकेट लिए । यसअघि टस जितेर पहिलो ब्याटिङ गरेको पुलिसका लागि अमित श्रेष्ठले उत्कृष्ट ब्याटिङ गर्दै १०६ रन बनाए । उनले ११८ बलमा १५ चौकाको मद्दतमा शतक पूरा गरेका हुन् ।

पुलिसविरुद्ध कमल खत्री, पुष्प थापा, दीपेश कँडेल र सिद्धान्त लोहनीले समान २-२ विकेट लिए । जीतसँगै पुलिसले २ खेलबाट ४ अंक जोडेको छ ।