भारत– भारतीय प्रधानमन्त्री नरेन्द्र मोदीले चिनियाँ राष्ट्रपति सी जिन्पिङसँग यही वर्षको अन्त्यतिर अनौपचारिक भेटवार्ता गर्ने भएका छन् ।

भारतीय विदेशमन्त्रालयले विज्ञप्ति जारी गर्दै प्रधानमन्त्री मोदीले राष्ट्रपति सीसँग अनौपचारिक भेटवार्ता गर्ने जनाएको हो ।

यसअघि गत वर्षको अप्रिल महिनामा दुई नेताबीच भएको अनौपचारिक भेटवार्ताका क्रममा अर्को वर्ष पुनः भेटवार्ता गर्ने गरी भएको सम्झौता अनुसार यस वर्षको उत्तरार्धमा पुनः भेटवार्ता हुने जनाइएको छ ।

भेटवार्ताको मिति तथा स्थान भने कुटनीतिक च्यानलमार्फत तय गरिने बताइएको छ । यद्यपि भारतीय सञ्चारमाध्यमले भने दुई नेताबीच अक्टोबर महिनामा बनारसमा भेटवार्ता हुनसक्ने जनाएका छन् ।

दुई वर्षअघि चीन र भुटानको सीमा क्षेत्रमा तनाव उत्पन्न भएयता सम्बन्ध सुधारका दिशामा रहेका दुई मुलुकका नेताबीच हुने भेटवार्तालाई महत्वका साथ हेरिएको छ ।