काठमाडौं– निकै आकर्षक र सुन्दर बासस्थान बनाउन माहिर मानिन्छ तोप चरा । यही कलात्मक घर बनाउने भएकै कारण यस चरालाई इन्जिनियर चराको उपमा समेत दिइन्छ ।

इन्जिनियरिङ्ग पढेका विद्यार्थीले बनाएका घरका आकार विग्रिएलान् तर सीप नसिकेका यी चराहरुले आफ्नो बासस्थान निकै सुरक्षित बनाउँछन् । कीर्तिपुर भत्केपाटीस्थित मानवबस्ती नजिक खेतबारीको अग्ला रुखमा तोप चराले बनाइरहेका गुँड हेर्दा जो कोहीलाई लोभ्याउँछ ।

वसन्त ऋतुको आगमनसँगै कलात्मक शैलीको शिल्प प्रयोग गरी यी चराहरुले रुखको हाँगामा घाँसपात र डाँठको मसिनो धागोजस्तो रेशाबाट अण्डाकार गुँड बनाउँछन् । यही कलात्मक गुँड बनाउने भएकै कारण तोप चरालाई इञ्जिनीयर चराको उपमा दिइएको हुनुपर्छ ।