एजेन्सी – विश्व चर्चित फुटबल लिग ‘ला लिगा’मा म्याच फिक्सिङ भएको आरोपका स्पेन प्रहरीले खेलाडीहरुलाई पक्राउ गरेको छ । सन् २०१८–०१९ को सिजनमा भएका विभिन्न खेलमा म्याच फिक्सिङ भएको पाइएपछि प्रहरीले बर्तमानसहित केही पूर्व खेलाडीहरुलाई पनि पक्राउ गरेको जनाएको छ।

ला लिगाले ८ वटा खेलमा म्याच फिक्सिङ भएको भन्दै पक्राउ परेकाहरुलाई कारबाहीका प्रक्रिया अघि बढाएको हो । म्याच फिक्सिङको उजुरी परेपछि स्पेन प्रहरीले अनुसन्धान थालेको थियो । जसबाट दुई डिभिजनका बर्तमान खेलाडीदेखि पूर्व खेलाडीको संलग्नता रहेको भेटिएको हो । स्पेनको एलप्रियडिको नामक सञ्चारमाध्यमले म्याच फिक्सिङमा संलग्नहरुको सूची सार्वजनिक गरेको छ । ‘मे २०१८ मा भएका खेलहरुमा फिक्सिङको आरोपसहित स्पेनका अधिकारीहरुले प्रहरीमा रिपोर्ट गरेका थिए’- ला लिगाका प्रवक्ताले भने ।

प्रहरीले छुट्टै संयन्त्र बनाएर फुटबललाई गलतरुपमा प्रयोग गर्न खोज्नेहरुलाई पक्राउ गरी कारबाहीका लागि सिफारिस गरेकोमा ला लिगाले विज्ञप्ति जारी गर्दै प्रहरीको कामको प्रशंसा गरेको छ ।