काठमाडौं- विभागीय टोली त्रिभुवन आर्मी क्लबले प्रधानमन्त्री कप एकदिवसीय क्रिकेट प्रतियोगितामा लगातार तेस्रो जीत हात पारेको छ । प्रस्तावित मुलपानी अन्तर्राष्ट्रिय क्रिकेट मैदानमा मंगलबार भएको खेलमा आर्मीले कर्णाली प्रदेशलाई ११७ रनको फराकिलो अन्तरले पराजित गरेको हो ।

आर्मीले दिएको २९१ रनको लक्ष्य पछ्याएको कर्णाली प्रदेशले ३५ ओभर १ बलमा सबै विकेट गुमाएर १७३ रन मात्रै बनाउन सक्यो । कर्णालीका सुशान्त थापाले ३१ रन, ललित प्याखुरेलले २८ रन, दिवान पुनले २६ रन र युनिस सिंहले २० रन बनाए । कर्णालीविरुद्ध आर्मीका बलरहरुले उत्कृष्ट बलिङ गरे । आर्मीका सुशान भारीले ४ विकेट लिए भने करण केसी र सहाव आलमले समान २-२ विकेट लिए ।

यसअघि टस हारेर पहिले ब्याटिङ गरेको आर्मीले निर्धारित ५० ओभरमा पुरा खेल्दै ९ विकेट गुमाएर २९० रनको योगफल बनाएको थियो । आर्मीका लागि तीन जना ब्याट्सम्यानले अर्धशतक पुरा गरे । ओपनिङ ब्याट्सम्यान राजु रिजालले ६६, रोहित कुमार पौडेलले ५६ रन बनाउँदा अर्का ओपनिङ ब्याट्सम्यान हरिकृष्ण झाले ५२ रन बनाए ।

आर्मीविरुद्ध कर्णालीका ललित प्याकुरेलले ५ विकेट लिएका थिए । तीनवटै खेललगातार जीतेको आर्मी समूह ‘बी’ मा ६ अंकसहित शीर्ष स्थानमा छ ।