काठमाडौं– कठामाडौंमा कोठा खोजिदिने भन्दै विभिन्न व्यक्तिबाट पैसा उठाएर ठगी गर्ने व्यक्ति पक्राउ परेका छन् ।

सामाजिक सञ्चाल फेसबूकमा ‘रूम एण्ड फ्ल्याट अन रेन्ट इन काठमाडौं’ नामक पेज बनाएर विभिन्न व्यक्तिबाट काठमाडौंमा कोठा खोजिदिने भनेर पैसा उठाउने व्यक्ति पक्राउ परेका हुन् ।

पक्राउ पर्नेमा भोजपुर घर भइ हाल जुम्लाको चन्दननाथ बस्ने २६ वर्षीय रामचन्द्र भट्टराई छन् ।

फेसबूक पेजमा विभिन्न प्रकारका खाली भएका कोठाको तस्वीर राखेर उनले कोठा खोजिदिन आग्रह गर्ने व्यक्तिसँग पैसा उठाउँदै आएका थिए ।

ठगिएका व्यक्तिको उजुरीका आधारमा उनलाई पक्राउ गरिएको महानगरीय अपराध महाशाखाले जनाएको छ ।

महाशाखाका अनुसार उनले अनलाइन पेमेन्ट गेटवे (इसेवा, आइएमई पे’ लगायतबाट विभिन्न व्यक्तिसँग कोठा खोजिदिने भन्दै पैसा उठाउने गर्दथे । यसरी उनले २ सय ५० भन्दा बढीलाई ठगेको प्रहरीले जनाएको छ ।