काठमाडौं– स्थालमार्ग हुँदै भारत जाने नेपालीहरुको राहदानीमा प्रस्थान छाप नलगाउन सरकारले मातहतका निकायलाई निर्देशन दिएको छ । पछिल्लो समय भारत जाने नेपालीहरुको राहदानीमा सीमा क्षेत्रमा रहेका अध्यागमन विभागका शाखा कार्यलयहरुले छापा लगाउन थालेपछि अध्यागमन विभागले उक्त कार्य रोक्ने विज्ञप्ती जारी गरेको छ ।

नेपालबाट रोजगारी तथा  अन्य कामका लागि भारत जादाँ पनि विगत केही महिनादेखि अध्यागमन प्रहरीले केही ठाउँमा राहदानी खोज्ने र प्रस्थान छापा लगाउँदै आएको थियो । सानो कामका लागि भारत जाँदा पनि प्रहरीले राहदानी र अन्य कागतजागत खोज्न थालेपछि सवसाधरणले सास्ती भएको भन्दै सरकारको ध्याषर्कण गराएका थिए ।

राहदानीमा प्रस्थान छापा नलगाइ भारत जान रोक लगाउन थालेपछि सीमा क्षेत्रका नागारिकले समस्या भएको भन्दै यो कार्य रोक्न माग गर्दै आएका थिए । काकरभिट्टा, पशुपतिनगर, विरानगर, वीरजञ्ज, बेलहिया, जमुनाहा, मोहना (कैलाली) र गड्डाचौकी नाका हुँदै भारत जाने नेपालीको राहदानी माग्ने तथा प्रस्थान छाप लगाउने काम नगर्न अध्यागमन विभागले मातहतका कार्यालयलाई निर्देशन दिएको छ ।

यसैगरी भुटान र बंगालादेश जाने नेपालीका हकमा भने अनिवार्य रुपमा प्रस्थान छाप लगाए मात्र जाने अनुमति दिन विभागले सीमा क्षेत्रका कार्यलयलाई निर्देशन दिएको छ । पछिल्लो समय रोजगारी अन्य कामका लागि नेपालीहरु भारत हुँदै बंगलादेश र भुटान जाने क्रम बढेपछि विभागले अनिवार्य राहदानी र प्रस्थान छाप लगाउनु पर्ने व्यवस्था गरेको जनाएको छ ।

यो भन्दा अगाडी बंगलादेश र भुटान जाने नेपालीले आफनो परिचय खुल्ने नागरिकता तथा परिचयपत्र बोकेर जाने गरेको थिए । अब भने राहदानी र प्रस्थान छाप अनिवार्य गरिएको अध्यागमनले जानकारी दिएको छ ।