काठमाडौं– ‘अमेरिकी राजदूतसँग गफ गाफ’ कार्यक्रमको पहिलो अंक सार्वजनिक भएको छ । अध्ययनका लागि अमेरिका जान चाहनेहरुको जिज्ञासालाई समेट्ने गरी तयार पारिएको यो कार्यक्रमको अंकमा नेपाली विद्यार्थीको अमेरिकी शिक्षा प्रतिको मोह र त्यसका लागि अमेरिकी सरकार र नेपालस्थित अमेरिकी दूतावासले गर्ने सहयोगका विषयमा सल्लाह दिइएको छ ।

यो कार्यक्रमको प्रोमोका रुपमा सार्वजनिक गरिएको ३४ सेकेन्डको भिडियोमा पनि अमेरिकी शिक्षा तथा भिसा प्रक्रियाका विषयलाई देखाइएको छ । जुन भिडियोमा प्राचीले अमेरिकी शिक्षाका लागि भिसा प्रक्रियाका विषयमा अमेरिकी राजदूत र्‍यान्डी बेरीलाई सोधेको प्रश्नमा निक्कै गज्जबले जवाफ दिएका छन् ।

‘अमेरिकामा पढ्न चाहने विद्यार्थीलाई के सल्लाह दिनुहुन्छ ?’ भन्ने प्राचीको प्रश्नमा राजदूत बेरीले भनेका छन्, ‘प्राचीजी, प्रश्नका लागि धन्यवाद । अधिकांश विद्यार्थीहरुले शुरुमै अध्ययन भिसा बारे सोध्छन् । जबकि वास्तवमा अमेरिकामा अध्ययन गर्ने प्रक्रियाको तयारी गर्नकै लागि निक्कै समय र परिश्रम लाग्छ । यदी तपाईं सम्भावित विद्यार्थी हो भने, तपाईंलाई अमेरिकी दूतावासमा रहेको हाम्रो अमेरिकन सेन्टरमा आउन र हाम्रा अमेरिकी शिक्षा सम्बन्धि काम गर्ने सल्लाहकारसँग भेट्न प्रोत्साहित गर्दछु । ता कि तपाईंलाई अमेरिकामा अध्ययन गर्ने सम्बन्धी परीक्षा र तयारी बारे सही सूचना मिलोस।

अहिले अमेरिकाका ४ हजारभन्दा बढी कलेज र विश्वविद्यालयमा विश्वभरमा विद्यार्थी अध्ययनका लागि पुगेको दाबी गर्दै दूतावासले अमेरिकामा पढ्न जाने विद्यार्थीको संख्या प्रत्येक वर्ष बढ्दै गएको जनाएको छ ।

यसरी अमेरिकामा पढ्न जाने विद्यार्थीको संख्या बढ्सँगै सबैको एउटै जिज्ञासा हुने भएकाले सोही जिज्ञासालाई सम्बोधन गर्ने गरी नेपालस्थित अमेरिकी दूतावासले ‘गफगाफ’ शीर्षकमा कार्यक्रम तयार पारेको हो ।