धेरै मानिस फलफूल तथा तरकारी खाँदा बोक्रा खान मन पराउँदैनन् । गुदीको तुलनामा बोक्रा बेस्वादिलो हुने, खान मन नलाग्ने उनीहरुको तर्क रहन्छ । तर फलफूल र तरकारीका बोक्रामा पनि शरीरलाई फाइदा दिने भिटामिन लगायतका तत्वहरु हुन्छन् । कतिपय फलफूल र तरकारीमा गुदीमा भन्दा बोक्रामा बढी भिटामिन, मिनिरल पाइन्छ ।

स्याउ

स्याउको गुदी नरम, मीठो हुन्छ तर बोक्रा कडा, टर्रो, अमिलो, चपाउन गाह्रो हुन्छ । त्यसैले धेरैले स्याउ बोक्रासँगै खानुको साटो तासेर खान्छन्। तर स्याउको गुदीको तुलनामा बोक्रामा ३३२ प्रतिशत बढी भिटामिन के, १४२ प्रतिशत बढी भिटामिन ए, ११५ प्रतिशत बढी भिटामिन सी, २० प्रतिशत बढी क्याल्सियम र १९ प्रतिशतभन्दा बढी पोटासियम पाइन्छ । बोक्रा तासेर फ्याल्दा धेरै भिटामिन तथा पोषक तत्व जान्छ ।

आलु

बोक्रासहित उसिनेको आलुमा बोक्रा फ्याँकेको आलुको तुलनामा १७५ प्रतिशत बढी भिटामिन सी, ११५ प्रतिशत बढी पोटासियम, १११ प्रतिशत बढी फोलिक एसिड र ११० प्रतिशत बढी म्याग्नेसियम तथा फस्फोरस पाइन्छ । बोक्रा तासेर उसिनेको आलु खाँदा उपयोगी भिटामिन तथा पोषक तत्त्व पनि गुम्छ ।