एजेन्सी- बलिउड अभिनेता अजय देवगनका पिता एवं वरिष्ठ द्वन्द्व निर्देशक वीरु देवगनको निधन भएको छ । पछिल्लो केही समययता स्वास्थ्यमा समस्या देखिएपछि अस्पताल भर्ना भएका उनको सोमबार बिहान ८५ वर्षको उमेरमा निधन भएको भारतीय सञ्चारमाध्यमले जनाएका छन् । बलिउड चलचित्रका पुराना द्वन्द्व निर्देशक एवं स्टन्टम्यान उनले ८० वटाभन्दा बढी चलचित्रमा द्वन्द्व निर्देशन गरेका छन् ।

सन् १९३४ मा अमृतसरमा जन्मिएका उनले १९९९ मा ‘हिन्दुस्तान कि कसम’  हिन्दी चलचित्रमा निर्देशन पनि गरे । उक्त चलचित्रमा आफ्नै छोरा अजय देवगन र अमिताभ बच्चनलाई अभिनय गराएका थिए ।

उनले द्वन्द्व निर्देशन गरेको चलचित्र दिल्वाले (१९९४), हिम्मतवाला (१९८३) र शेहेन्शाह (१९८८) सुपरहिट भएका थिए । उनको सोमबार साँझ नै अन्तिम संस्कार गरिने भारतीय सञ्चारमाध्यमले परिवारलाई उदृत गर्दै जनाएका छन् ।

वीरु देवगनको परिवारमा पत्नी वीणाका साथै दुई छोराका रुपमा अभिनेता अजय देवगन र निर्देशक अनिल देवगन रहेका छन् । यस्तै एक छोरी पनि छन् ।