काठमाडौँ– राष्ट्रिय प्रजातन्त्र पार्टी (राप्रपा)को कमल थापा पक्षको समीक्षा भेला होटल याक एन्ड यतिमा शुरु भएको छ ।

दरबारमार्गस्थित याक एन्ड यति होटलमा जारी भेलामा महाधिवेशनको चुनावी परिणामको समीक्षा हुने बताइएको छ ।

राजेन्द्र लिङ्देनसँग अध्यक्षमा पराजित भएपछि थापासहितको टीम समीक्षात्मक छलफलमा जुटेको हो ।

‘महाधिवेशनको समीक्षा गर्न याक एन्ड यतिमा सबै नेताहरु भेला हुनु भएको छ,’ थापा पक्षका एक केन्द्रीय सदस्यले भने ।

राप्रपामा अध्यक्षसहित नयाँ कार्यसमिति निर्वाचनका लागि शनिबार मतदान भएको थियो ।

आइतबार बिहान सार्वजनिक मत परिणामअनुसार लिङ्देनले १८ सय १७ र थापाले १६ सय १७ मत प्राप्त गरेका छन् । त्यसैगरी पदाधिकारीमा भने थापा समूहको वर्चश्व रहेको छ ।