काठमाडौँ- नेपाली राष्ट्रिय महिला टोली ट्वान्टी–२० विश्वकप क्रिकेटको छनोट नजिक पुगेको छ ।

विश्वकप क्रिकेटको एसियाली छनोट अन्तर्गत दुबईमा शुक्रबार भएको खेलमा मलेसियालाई ६ विकेटले पराजित गरेसँगै नेपाल छनोट नजिक पुगेको हो । नेपालको ४ खेलबाट ६ अंक भएको छ ।

नेपालले आफ्नो अन्तिम खेलमा आइतबार यूएईसँग खेल्नेछ । सो खेलमा फराकिलो जित निकाल्न सके नेपाल समुह विजेता बन्दै विश्वकप क्रिकेटका लागि छनोट हुनेछ । यद्यपि नेपालले अन्य खेलको नतिजा पनि कुर्नु पर्नेछ ।

एसियाली छनोटको जारी प्रतियोगितामा नेपालसहित यूएई र हङकङको पनि सम्भावना समान छ । यसअघिका तीनै खेलमा विजयी यूएईको ६ अंक छ भने हङकङको चार अंक छ ।

शुक्रबार नै यूएईले कुवेतसँग र हङकङले भुटानसँग प्रतिस्पर्धा गर्नेछन् । हारले मात्र पनि यूएई र हङकङको आगामी यात्रामा धक्का लाग्नेछ । आफ्नो अन्तिम खेलमा हङकङले कुवेतसँग आइतबार खेल्नेछ । मलेसिया, भुटान र कुवेतको यात्रामा भने पूर्ण बिराम लागिसकेको छ ।

दुबईमा मलेसियाले दिएको ९३ रनको मध्यम लक्ष्य नेपाली महिला टोलीले १० बल बाँकी छँदै ४ विकेट गुमाएर भेट्टाएको थियो । १६ रन जोड्दा ईन्दु बर्मालाई व्यक्तिगत ४ रनमा गुमाएको नेपालका लागि क्याप्टेन रुविना क्षेत्री र सीता राना मगरले दोस्रो विकेटका लागि ४८ रनको साझेदारी गर्दै जितको आधार तयार पारेका थिए ।

सीता ३० र रुविना २० रनमा रन आउट भए । कविता कँवर पनि १० रनमा आउट भइन् । सरिता मगर १५ र अप्सरी बेगम एक रनमा नटआउट रहे ।

यसअघि नेपालले टस जितेर फिल्डिङ रोजेपछि व्याटिङ गरेको मलेसियाले निर्धारित ओभरमा ७ विकेट गुमाएर ९२ रनको मध्यम योगफल तयार पारेको थियो ।

इल्सा हल्टरले ३९ रन बनाएको मलेसियाको इनिङ्समा ६ जना ब्याट्सवुमनले भने दोहोरो अंकको स्कोर छुन सकेनन् । मलेसियालाई कम योगफलमा रोक्ने क्रममा शबनम राईले २ तथा रुविना क्षेत्री, कविता कुँवर र सीता राना मगरले समान १–१ विकेट लिए ।