काठमाडौँ– प्रधानमन्त्री शेरबहादुर देउवाले हस्तकला क्षेत्रको विकास र प्रवद्र्धन गर्न सरकार प्रतिवद्ध रहेको बताएका छन् ।

नेपाल हस्तकला महासंघको आयोजनामा आजदेखि शुरु भएको १८ औँ हस्तकला व्यापार मेला तथा १६ औँ कला प्रतियोगिताको उद्घाटन गर्दै प्रधानमन्त्री देउवाले मुलुकको अर्थतन्त्रमा टेवा पुराउदै आएको हस्तकला क्षेत्रको विकास र प्रवद्र्धन गर्न प्रतिवद्ध रहेको बताए ।

हस्तकला निकासी गर्दै विदेशी मुद्राको आयआर्जनबाट मुलुकको आर्थिक घाटा न्युनीकरण हुने प्रधानमन्त्रीको विश्वास छ ।

हस्तकला क्षेत्रमा देखिएको कर सम्बनधी समस्यालाई सहजीकरण गर्ने उनले बताए । हस्तकला उद्योग नेपालको गरिमा र पहिचानको क्षेत्र भएकाले समयानुकल परिस्कृत गर्दै अघि बढाउनुपर्ने प्रधानमन्त्री देउवाको भनाइ छ ।

मंसिर ५ गतेसम्म चल्ने मेलामा हस्तकला लगायत विभिन्न वस्तुको करिब एकसय २० स्टल छन् । मेलाको प्रमुख आकर्षणमा कला प्रतियोगिताअन्तर्गत विभिन्न विधामा प्रतियोगिता गरिने र प्रतियोगीलाई पुरस्कृतसमेत गरिने महासंघका अध्यक्ष सुरेन्द्रभाइ शाक्यले जानकारी दिए ।