काठमाडौँ– नेपाल बार एशोसिएशनको आन्दोलनमा प्रहरी हस्तक्षेप नगर्न राष्ट्रिय मानवअधिकार आयोगले आग्रह गरेको छ । प्रधानन्यायाधीश चोलेन्द्र शमशेर राणाको राजीनामा माग्दै बार एशोसिएशनले शान्तिपूर्ण आन्दोलन गरिरहेको छ ।

बिहीबार सर्वोच्च अदालत परिसरमा प्रहरीले बारको आन्दोलनमा लाठी चार्ज गरेको थियो । प्रहरीको लाठी प्रहारबाट बार एशोसिएशनका अध्यक्ष चण्डेश्वर श्रेष्ठसहित अधिवक्ताहरु प्रकाश महर्जन, गोपाल सापकोटा, रमण कर्ण र कपिलचन्द्र पोखरेललगायत घाइते भएका थिए ।

बारको आन्दोलनमा प्रहरीले बल प्रयोग गरेपछि आयोगका प्रवक्ता टीकाराम पोखरेलले विज्ञप्ति जारी गर्दै शान्तिपूर्ण आन्दोलनमा बल प्रयोग गर्नु अन्तर्राष्ट्रिय कानुन विपरीतको कार्य भएको भन्दै छानबिन गरी दोषी देखिएकालाई कानुनी कारबाहीको दायरामा ल्याउन माग गरेका छन् ।

आयोगले बारको नेतृत्वमा भइरहेको आन्दोलनको आयोगले मानव अधिकारको दृष्टिकोणबाट निरन्तर अनुगमन गरिरहेको उल्लेख गरेको छ ।