काठमाडौं– सञ्चार तथा सूचना प्रविधि मन्त्री गोकुल प्रसाद बाँस्कोटाले राष्ट्रिय सभामा पेश भएको मिडिया काउन्सिल विधेय फिर्ता नहुने स्पष्ट पारेका छन् ।

मन्त्रिपरिषद्ले गरेका निर्णय सार्वजनिक गर्न आयोजित पत्रकार सम्मेलनमा मन्त्री बाँस्कोटाले मिडिया काउन्सिल विधेयक विविध प्रक्रियाद्वारा अघि बढाइने बताएका हुन् ।

उनले मिडिया काउन्सिल विधेयकका विषयमा आएका सुझावका आधारमा नेपाली प्रेसले महशुस गरेका विषयलाई उठाइएको भन्दै यसलाई समयसापेक्ष बनाइने बताए ‘सही सूचना सम्प्रेषण गर्ने हो, किन दिग्भ्रमित पार्ने ? भन्दै प्रतिप्रश्न गरेका मन्त्री बाँस्कोटाले भने,‘ मिडिया काउन्सिल विधेयक शुसाशनका लागि हो । दुरुपयोग रोक्नलाई हो । हरेक कुरा कसैको जागरण अभियानमा लगेर घुसाउनु भएन नि ?’

सरकारले नेपाली प्रेस जगतका सकारात्मक विषयलाई सही दिशा निर्देश गर्ने कुरा लाई सहयोग गर्ने बताए । ‘लोकतान्त्रिक भनिएका मुलुकमा पनि जरिवानाको प्राबधान छ, तर कुन कुरा कता आकर्षित हुन्छ भन्ने कुरा महत्वपूर्ण हो । सच्याउने, संशोधन गर्ने प्रावधना हुन्छ, यही होइन त शक्ति पृथकीकरणको कुरा ?’ मन्त्री बाँस्कोटाले भने ।

उनले भने- ‘प्रेस स्वतन्त्रता कसैलाई ठोक्नलाई हो वा रोप्नलाई पनि हो ? नयाँ  चिज, संस्कृति, संस्कार, अर्थतन्त्र सबल बनाउन रोप्ने कुरा पनि महत्वपूर्ण हुन्छ ।’