काठमाडौँ- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशीविदेशी प्रतिक्रान्तिकारी र प्रतिगामीहरू आफूलाई हराउने मिसनमा लागेको आरोप लगाएका छन् ।

नेवा राष्ट्रिय मुक्ति मोर्चाले बिहीबार नेपाल संवतका अवसरमा आयोजना गरेको कार्यक्रममा अध्यक्ष दाहालले जनतामा माओवादीप्रति उभार देखिन थालेपछि उनीहरू आत्तिएर माओवादी सिध्याउन लागि परेको बताए ।

आफूले मूल मुद्दालाई फेरि उठाएकाले पार्टिभित्र आशा, उत्साह र भरोसा पलाएको उनले दाबी गरे । तर यसबाट प्रतिगामीहरु अत्तालिएको उनले बताए ।

ओलीलाई संकेत गर्दै दाहालले भने– तपाईहरुले हिजो अस्तिका भाषा पनि सुन्नुभयो होला, उनको टार्गेट माओवादी होइन, प्रचण्डप्रति देखिन्छ । प्रतिक्रान्तिकारी प्रतिगामीहरु जसरी हुन्छ प्रचण्ड सिध्याउने भनेर लागेका छन् । अहिले अनौठो लाग्न सक्छ,सबै मिलेर प्रचण्डलाई हराउनेमा छन् ।’

उनले पहिचान र समानुपातिक चुनावी प्रणालीको मुद्दा नछाडेको र त्यसलाई घनिभूतरुपमा उठाउने बताएका छन् । संविधानसभा पहिचानको विषयलाई नोट अफ डिसेन्ट राखेको उनले स्मरण गराए ।

पूर्वसचिव रामेश्वर खनालले माओवादी सिद्धिनुपर्छ भनेर दिएको अभिव्यक्तिमा पनि उनले आपत्ति जनाए ।