काठमाडौँ– नेपाली कांग्रेसका केन्द्रीय सदस्य डा. शेखर कोइरालाले प्रधानन्यायाधीश चोलेन्द्र शमशेर राणाले तत्काल राजीनामा दिनुपर्ने बताएका छन् । सर्वोच्च अदालतका न्यायाधीशहरुले राणाले तोकेको इजलास स्वीकार गर्दै राजीनामा मागिरहेका छन् भने नेपाल बार एशोसिएसनले आन्दोलन गरिरहेको छ ।

यस्तो अवस्थामा सत्तारुढ दलका प्रभावशाली नेता कोइरालाले राणाले तत्काल राजीनामा दिनुपर्ने बताएका हुन् । बुधबार बुटवलमा गुल्मी–रुपन्देही सम्पर्क समितिले आयोजना गरेको शुभकामना आदान प्रदान कार्यक्रममा बोल्दै काँग्रेस केन्द्रीय सदस्य डा कोइरालाले राणा कार्यपालिकामा भाग माग्ने व्यक्ति भएको भन्दै उनले राजीनामा दिनुपर्ने बताए ।

कोइरालाले राणालाई कार्यपालिकामा भागबण्डा गर्न दिने पक्ष पनि उत्तिकै दोषी भएको बताए । ‘जबरा कार्यपालिकामा भागबण्डा खोज्ने व्यक्ति हुन् । यसमा भाग लिने पक्ष मात्रै हैन भाग दिने पक्ष पनि उत्तीकै दोषी छ ।’

न्यायालयमा अहिले संकट आएको बेला कांग्रेस चुप लाग्न नमिल्ने उनको भनाइ छ । यो विषयमा कांग्रेसले बोल्नुपर्ने उनले बताए । उनले भने, ‘काँग्रेसले यसमा बोल्नु पर्दैन ?, के हामी काँग्रेस भएकै कारण चुप लागेर बसेका हौ ?’

पार्टी महाधिवेशनको प्रसंगमा बोल्दै डा. कोइराालले सभापति शेरबहादुर देउवाले महाधिवेशन आफू अनुकुल बनाउनु ब्यूरोक्रेट्सको प्रयोग गरिरहेको दाबी गरे । उनले महाधिवेशन तोकिएको समयमा निष्पक्ष रुपबाट हुनुपर्ने बताए ।

अर्को प्रसंगमा बोल्दै डा. कोइरालाले आगामी निर्वाचनमा कांग्रेसले गठबन्धन नगर्ने बताए । उनले कांग्रेस एक्लै चुनावमा जानुपर्ने उल्लेख गरे ।