काठमाडौँ– अनुगमनका क्रममा पानीका जार फोहोर भेटिएपछि जिल्ला प्रशासन कार्यालय काठमाडौँले गोकर्णेश्वरस्थित क्वालिटी खानेपानी प्रालिमा शिलबन्दी गरेको छ । मंगलबार सहायक प्रमुख जिल्ला अधिकारी अनुप केसीको टोली प्रालिमा पुगेर अनुगमन गरेको थियो ।

अनुगमनका क्रममा पानी प्रशोधन कक्षमा रिजर्भ ओस्मोसिस मेसिनबाट पानी चुहिएको, जार सरसफाई कक्ष सन्तोषजनक नभएको, मेसिनरी तथा उपकरण मर्मत संभार गर्ने रेकर्ड नराखेको, प्रशोधित पिउने पानी उत्पादन मापदण्ड नभएको फेला परेको प्रशासनले जनाएको छ ।

प्रयोगशाला प्रतिवेदन निर्देशिका बमोजिम पेश गर्न नसकेको जस्ता कैफियत देखिएकोले उक्त कैफियतहरु सुधार गरी अभिलेख तयार गरी तथा प्रचलित मापदण्ड पुरा गरेर मात्र उत्पादन तथा बिक्री वितरण गर्ने गरी उद्योगमा शिल गरिएको प्रशासनले जनाएको छ । साथै प्रशासनले पुराना जार नष्ट गर्न निर्देशन दिएको छ ।