अमेरिका– अमेरिकाले सिरियामा जारी युद्धका क्रममा सिरिया सरकारले रासायनिक आक्रमण गरेको संकेत देखिएको आरोप लगाएको छ ।

अमेरिकी विदेशमन्त्रालयले जनाएअनुसार सिरिया सरकारले युद्धका क्रममा विषाक्त रासायनिक ग्याँस क्लोरिन र अन्य रासायनिक हतियार प्रयोग गरेको संकेत देखिएको छ ।

विदेश मन्त्रालयले सिरिया सरकारले हाल विद्रोहीको नियन्त्रणमा रहेको इडलिब प्रान्तमा जारी युद्धका क्रममा गत आइतबार यस्तो हतियार प्रयोग भएको संकेत देखिएको जनाएको हो । अमेरिकी विदेशमन्त्रालयका अनुसार यस्ता रासायनिक हतियारको प्रयोग भएकोबारे छानबिन भइरहेको र त्यो प्रमाणित भए अमेरिका र साझेदारले त्यसको कडा जवाफ दिने चेतावनी समेत दिनेछन् ।

त्यस्तै, अमेरिकाले सिरियामा जारी युद्धबारे दुष्प्रचार अभियान सञ्चालन गरेको भन्दै रुसको समेत आलोचना गरेको छ ।

पछिल्लो समय सिरिया सरकारले विद्रोहीको नियन्त्रणमा रहेको इडलिब प्रान्तमा व्यापक सैनिक आक्रमण गर्दै आएको छ ।

यसअघि पनि सिरिया सरकारले रासायनिक हतियार प्रयोग गरेको आरोप लाग्दै आएको छ । तर, सिरिया सरकारले भने यस्ता कुनै हतियार प्रयोग नगरेको स्पष्ट पार्दै आएको छ ।

अमेरिकाले यसअघि सिरिया सरकारले रासायनिक हतियार प्रयोग गरेको आरोप लगाउँदै सिरियामा दुई पटक क्षेप्यास्त्र आक्रमण गरिसकेको छ ।