काठमाडौं– प्रमुख प्रतिपक्ष दल नेपाली काँग्रेसले करारमा कार्यरत कर्मचारीहरुलाई पनि उपदानको व्यवस्था गर्न माग गरेको छ ।

मंगलबार संघीय संसदको राज्य व्यवस्था तथा सुशासन समितिको बैठकमा ‘संघीय निजामती सेवाको गठन, संचालन र सेवाको सर्त सम्बन्धमा व्यवस्था गर्न बनेको विधेयक’माथिको छलफलमा सहभागी कांग्रेसका नेता दिलेन्द्र बडुले करार कर्मचारीलाई पनि सेवा सुविधा दिनुपर्ने माग गरेका हुन् ।

उनले कुनै पनि करार कर्मचारी उसले गरेको सेवा अवधिको मूल्यांकन गरी उपदान दिन सरकारसँग माग गरे । उनले योगदानमा आधारित सामाजिक सुरक्षाको प्रबन्धबाट करारमा कार्यरत कर्मचारीहरुलाई बञ्चित गराउन नहुने तर्क गरे । उनले भने, ‘करारमा कार्यरत कर्मचारीलाई उनीहरुले गरेको सेवा अवधि बराबरको उपदानको व्यवस्था हुनुपर्छ, यसतर्फ सरकार पनि गम्भीर बन्नुपर्छ ।’

समितिका अर्का सदस्य प्रेम सुवालले शैक्षिक प्रमाणपत्रको आधारमा कर्मचारीहरुको सेवा र सुविधाको व्यवस्था गर्न सरकारलाई सचेत गराए । उनले मुख्य सचिवको नियुक्ती मन्त्रिपरिषद बैठकले गर्न नहुने धारणा राखे । समितिकी सदस्य रामकुमारी झाँक्रीले खुला प्रतियोगिताबाट सहसचिव नियुक्त गर्ने व्यवस्था प्रभावकारी नहुने तर्क गरेकी थिइन् ।