महोत्तरी– गाउँपालिकाभर करिब ८ सय महिला गर्भवती छन्, तर गाउँपालिकामा एउटा पनि प्रसूतिगृह (बर्थिङ सेन्टर) छैन । यो पीडा महोत्तरीको महोत्तरी गाउँपालिकाको हो ।

गाउँपालिकाभर एउटा पनि प्रसूतिगृह नहुँदा त्यहाँका गर्भवती महिलालाई सुरक्षितरुपमा बच्चा पाउन समस्या भएको हो ।

३० हजार हजारभन्दा बढी जनसङ्ख्या रहेको यो गाउँपालिकामा अहिले करीब ८०० महिला गर्भवती छन् । तर, गाउँपालिकाभरि एउटा पनि प्रसूतिगृह नरहेको गाउँपालिकाका स्वास्थ्य सहसंयोजक सरोजकुमार झाले बताए ।

साविकका ३ ओटा गाविस महोत्तरी, गोनरपुरा र डाम्हीमडै मिलेर बनेको गाउँपालिकामा ३ ओटा स्वास्थ्य चौकी छन् । तर, कुनै पनि स्वास्थ्य चौकीमा बर्थिङ सेन्टरको व्यवस्था छैन ।

गाउँपालिकाभर बर्थिङ सेन्टर नहुँदा गर्भवती महिलालाई सदरमुकामस्थित जिल्ला अस्पताल वा जनकपुर अञ्चल अस्पताल लैजानुपर्ने बाध्यता रहेको वडा नं ५ की महिला स्वास्थ्य स्वयंसेविका बेदनीदेवी महतोले बताइन् ।

महतोका अनुसार गाउँमा प्रसूतीगृह नहुँदा गर्भवति महिलाहरुलाई नियमित स्वास्थ्य जाँचका लागि समेत जिल्ला अस्पताल वा जनकपुर अस्पताल जानुपर्ने वाध्यता छ ।