काठमाडौँ– नेकपा एमालेका अध्यक्ष केपी शर्मा ओलीले कांग्रेसकै कारण राजा महेन्द्रले निरंकुश पञ्चायती व्यवस्था लाद्न पाएको दाबी गरेका छन् ।
श्वेतशार्दूल (मदन भण्डारी) पुस्तक विमोचन कार्यक्रमलाई सम्बोधन गर्दै ओलीले २००७ सालको क्रान्तिपछि कांग्रेसले कम्युनिस्टमाथि निषेधको राजनीति गर्दा पञ्चायत आएको आरोप लगाए ।
‘कांग्रेसको सुरुदेखि नै एउटा प्रवृत्ति देखायो । राणा प्रधानमन्त्री हुँदा बरु कम्युनिस्ट पार्टीले सहकार्य गर्न पायो । तर, कांग्रेसले पुष्पलालजस्ता कम्युनिस्टमाथि प्रतिबन्ध लगायो । निषेधको राजनीति गर्यो । ०१७ साल कसरी आयो भने प्रगतिशील शक्ति दबाउने र प्रतिक्रियावादी शक्तिसँग सहकार्य गर्दा आयो । राजनीतिक शक्तिबीच एकता नभएको र दलहरूबीच फाटोको फाइदा प्रतिक्रियावादीले लिए,’ ओलीले भने ।
०१७ सालपछि पुष्पलालले अग्रपंक्तिमा ‘कु’ विरुद्ध लडेको, कांग्रेसका नेता कार्यकर्ताको रिहाइको माग गरेको उल्लेख गर्दै ओलीले पुष्पलाले मिलेर जाउँ भन्दा बिपीले अस्वीकार गरेको र बिपीसँग पुष्पलाल मिलेर जान नसकेको बताए ।
तर, मदन भण्डारीले गणेशमान सिंह र कृष्णप्रसाद भट्टराईलाई कन्भिन्स गरेर ०४६ मा संयुक्त जनआन्दोलन सफल भएको र निरंकुश पञ्चायत ढाल्न सफल भएको ओलीको भनाइ थियो ।
‘यसबीचमा संसदीय निर्वाचन गराउने, संविधान बनाउने, संसदलाई कसरी अगाडि बढाउने कामहरू भए । सामाजिक न्याय समानताको प्रश्नलाई कसरी हल गर्ने भनेर मदन भण्डारीले सिलसिलेवार विचार दिनुभयो । सही विचार निकाल्ने र सम्प्रेषण अत्यन्तै प्रभावकारी ढंगले गर्नुभयो,’ उनले भने ।
०४७ सालको संविधानमा पनि भण्डारीले केही बुँदामा असहमति जनाएको र ती असहमतिहरू ४ जेठ ०६३ मा आइपुगेर पुनर्स्थापित संसदमा पेस भएको स्मरण गरे । ‘मदन भण्डारीका सामाजिक न्याय र समानताका प्रश्नलाई पत्नी विद्यादेवी भण्डारीले सर्वदलीय सहमति जुटाएर पुनर्स्थापित संसदमा चार बुँदे पेस गर्नुभयो । महिलालाई ३३ प्रतिशत, अंशवण्डाको अधिकार लगायतका कुराहरू अगाडि बढाउनुभयो । जसले पछि संविधानमा स्थान बनायो । अहिले हामी अघि बढ्दैछौं,’ उनले भने ।
नेपाली समाजको स्थिति के हो, यसलाई कसरी अगाडि बढाउने भनेर मदन भण्डारीले बाटो देखाएको औलीको भनाइ थियो । ‘परिवर्तन मौलिक ढंगले हुन्छ । विचारधारा प्रयोगबाट निस्किन्छ भन्ने देखाए । विचार युगीन हुन्छ । चिन्तनहरू व्यवहारबाटै सिर्जना हुन्छ । मदन भण्डारी त्यहीँ बाटोबाट अघि बढ्दै जाँदा जनताको बहहुदलीय जनवाद आयो,’ उनले भने ।
मदन भण्डारीले समाजलाई योगदान, मार्गदर्शक गर्ने, अनुपयुक्त समाजलाई उपयुक्त मार्गतिर लाने, विचारमा संगठित गर्ने, मानव समुदायलाई प्रतिनिधित्व गर्ने त्यसलाई एउटा वैचारिक आन्दोलन गर्ने अगाडि बढाउने काम गरेको र उनको जीवन असाधारण गतिमय रहेको ओलीको भनाइ थियो ।
उनले लोकतन्त्रका लागि नेपाली कांग्रेसका नेताको भन्दा कम त्याग आफूहरुले नभएको बताए । उनीभन्दा अगाडि बोलेका पूर्वसभामुख दमननाथ ढुंगानाले कम्युनिस्टहरुले पावर केन्द्रित गर्छन् भनेका थिए । त्यसमा असहमति जनाउँदै ओलीले आफूहरुले रगत पसिना बगाएर लोकतन्त्र ल्याएको बताए ।
उनले भने, ‘हामी अतिथि लोकतन्त्रवादी होइनौं, रैथाने लोकतन्त्रवादी हौं । लोकतन्त्रका लागि नेपाली कांग्रेसका कुनै नेताले भन्दा कम त्याग गरेका छैनौँ ।’
प्रतिक्रिया