काठमाडौं– स्वम्भूको पूर्वी गेटमा निर्माण गरिएको नयाँ प्रवेशद्वार महानगरपालिकाले भत्काएको छ ।

स्वयम्भू संरक्षण महासमितिको स्वीकृति रहेको भन्दै मनाङ समाज नामक संस्थाले गेट बनाउन सुरु गरेपछि स्थानीयले चर्को बिरोध गरेका थिए ।

विनाशकारी भूकम्पले गेट भत्किएसँगै सम्पदा क्षेत्रमा ठूला गेट नबनाउने निर्णय पुरात्तव विभागले गरेको थियो ।

तर उक्त संस्थाले पुरातत्व विभागसँग अनुमति नलिइ गेट निर्माण गरेपछि शुक्रवार महानगरको स्रोत र साधन प्रयोग गरेर गेट भत्काइएको सम्पदा बचाउ अभियान संघर्ष समितिका अध्यक्ष गणपतिलाल श्रेष्ठले जानकारी दिए ।

पुनर्निर्माण गर्ने क्रममा क्रंक्रिटको गेट हालेको र पुराना संरचनालाई मास्दै नयाँ संरचना बनाएको भन्दै स्थानीय र सम्पदा बचाउ अभियानकर्ताहरुले वडा कार्यलय, महानगर तथा पुरातत्व विभागलाई ध्यानकर्षण समेत गराएका थिए ।

विश्वसम्पदा क्षेत्रमा पुरातत्व विभागको अनुमति बिना कुनै पनि संरचना फेरबदल गर्न नपाइने नियम छ ।