फ्रान्स– फ्रान्सका एक चिकित्सकमाथि ९ जना बिरामीको हत्या गरेको अभियोग लागेको छ । पूर्वी शहर बेसानकनमा एनेस्थेसिस्ट अर्थात् बिरामीलाई बेहोस पार्ने काममा संलग्न चिकित्सक डा. फ्रेडरिख पेचियरलाई ९ जना बिरामीको हत्या गरेको अभियोग लागेको हो ।

उनले बिमारीलाई बेहोस पार्ने क्रममा विष दिने गरेको र यसबाट बिमारी मृत्युको मुखमा जाने गरेका थिए । त्यसपछि ती चिकित्सकले ‘वीरतापूर्वक’ उपचार गरी बिमारीलाई मुत्युको मुखबाट फर्काउने गरेका थिए ।

अधिकारीहरुले छानबिन गरेका ६६ मध्ये २४ शंकास्पद उपचारमा चिकित्सकले बिमारीलाई पोटासियम क्लोराइड नामक खतरनाक पदार्थ दिएका थिए । पोटासियम क्लोराइडले मानिसलाई हृदयघात गराउने बताइन्छ ।

पोटासियम क्लोराइड दिएको बिरामीलाई हृदयघात भएपछि मृत्युको मुखमा पुग्ने गरेको र त्यसपछि ती चिकित्सकले बिरामीलाई ‘वीरतापूर्वक’ बचाउने गरेका थिए । तर, उनको यस्तो कर्तुत ९ पटक असफल भएपछि बिमारीको मृत्यु भएको थियो ।

चिकित्सक मनोवैज्ञानिक रुपमा समस्यामा रहेको हुनसक्ने आशंका गरिएको छ ।

ती चिकित्सकले भने आफूले काम गर्ने अस्पतालमा आपराधिक घटना हुने गरेको भएपनि आफू त्यसमा संलग्न नरहेको बताउँदै आएका छन् । यस अभियोगमा दोषी पाइए उनलाई आजीवन कारावासको सजायसम्म हुनसक्ने अन्तर्राष्ट्रिय सञ्चारमाध्यमले जनाएका छन् ।