काठमाडौँ- कप्तान ग्यारेथ बेलले ह्याट्रिक गरेपछि फिफा विश्वकप छनोटमा वेल्सले बेलारुसलाई पराजित गरेको छ ।

आइतबार भएको युरोपियन छनोटमा वेल्सले बेलारुसलाई ३-२ गोलले पराजित गरेको हो ।

बेलारुसको घरेलु मैदानमा बेलले सातौं मिनेटमा पेनाल्टीमा गोल गर्दै वेल्सलाई अग्रता दिलाएका थिए ।

२९औँ मिनेटमा भिटली लिसाकोभिचले पेनाल्टीमा गोल गर्दै घरेलु टोलीलाई १-१ गोलको बराबरीमा फर्काए ।

खेलको ३१औँ मिनेटमा पाभेल सेडकोले गोल गरेपछि घरेलु टिमले २-१ को अग्रता लियो । तर,खेलको ६९औँ मिनेटमा बेलले पेनाल्टीबाट व्यक्तिगत दोस्रो गोल गर्दै वेल्सलाई २-२ को बराबरीमा ल्याए ।

त्यसपछि खेलको इन्ज्युरी समयमा बेलले ह्याट्रिक पूरा गर्दै वेल्सलाई ३-२ को रोमान्चक जित दिलाए । जितसँगै वेल्सले ३ खेलमा ६ अंक जोडेको छ । वेल्स समूह ई को तेस्रो स्थानमा रहेको छ ।