काठमाडौँ– आफ्नै साथीको हत्या गर्ने नेपाली सेनाका सैनिक गंगाधार ढकाललाई २५ वर्षको जेल सजाय सुनाइएको छ । सैनिक हुद्दा भरत गुरुङको हत्या आरोपमा उनलाई सैनिक अदालतले जन्मकैदको सजाय सुनाएको हो ।

नेपाली सेनाको समरी जनरल सैनिक अदालतले विहीबार गुरुङको हत्यामा दोषी ठहर गर्दै सैनिक ढकाललाई सजाय सुनाएको नेपाली सेनाले जनाएको छ ।

गत साउन ७ मा चितवनको भरतपुर महानगरपालिका वडा नम्बर ७ सिमलडाँडामा गुरुङको शव फेला परेको थियो । सो प्रकरणमा पक्राउ परेका ढकालले नेपाली सेनाकै एसएमजी हतियारबाट गुरुङको हत्या गरेको खुलेको थियो ।

ढकालले प्रयोग गरेको सेनाको हतियार चोरीको आरोपमा यसअघि नै दुईजना सैनिक जवान लभकुमार गुरुङ र सरोज तामाङ जेल सजाय काटिरहेका छन् । उनीहरुले चोरेको भनिएको हतियार ढकालबाट बरामद भएकाले यो विषयमा नयाँ ट्वीस्ट आएको छ ।