अमेरिका– इरानसँग तनाव बढ्दै गइरहेको अवस्थामा अमेरिकाले इराकबाट आकस्मिक बाहेकका सबै कर्मचारीलाई फिर्ता बोलाएको छ ।

अमेरिकी विदेशमन्त्रालयले राजधानी बगदादमा रहेको राजदूतावास तथा इराकको स्वशासित क्षेत्र इराकी कुर्दिस्तानको राजधानी इर्बिलमा रहेको नियोगबाट अमेरिकी कर्मचारीलाई व्यावसायिक यातायातका माध्यमबाट इराक छाड्न निर्देशन जारी गरेको हो । त्यसबाहेक ती नियोगबाट भिसा सेवा पनि केही समयका लागि स्थगित गरिने बगदादस्थित अमेरिकी राजदूतावासले जनाएको छ ।

यद्यपि इराकबाट बाहिरिने अमेरिकी कर्मचारीको यकिन तथ्याङ्क भने खुलाइएको छैन । इरान समर्थित लडाकुबाट अमेरिकी नागरिक तथा कर्मचारीमाथि आक्रमण हुनसक्ने जोखिमलाई मध्यनजर गर्दै आफ्ना कर्मचारी फिर्ता बोलाइएको अमेरिकी भनाइ छ । केही समययता इरान र अमेरिकाबीच सम्बन्धमा तिक्तता आएपछि मध्यपूर्वमा फेरि अर्को युद्ध हुने जोखिम बढिरहेको बेला पछिल्लो अमेरिकी घोषणा आएको हो ।

यसअघि अमेरिकाले त्यस क्षेत्रमा १ लाख २० हजारको सङ्ख्यामा सेना तैनाथ गर्ने समाचार सार्वजनिक भएको थियो । अमेरिकाले इरानले मध्यपूर्वमा रहेका अमेरिकी फौज तथा अमेरिकी साझेदार मुलुकलाई खतरा पु¥याउन सक्ने भन्दै लडाकु विमान वाहक पानीजहाज तथा बम वर्षक विमा परिचालन गरिसकेको छ । यता इरानले भने अमेरिकाको आक्रमक कदमको कडा जवाफ दिने चेतावनी दिइसकेको छ ।