काठमाडौं–  प्रधानमन्त्री केपी शर्मा ओलीले  प्रधानमन्त्रीस्तरबाट पहिलोपटक भएको भियतनाम र कम्बोडियाको भ्रमण फलदायी भएको बताएका छन् । बुधबार अपराह्न स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै भ्रमण दुई पक्षीय हितमा विभन्न सम्झौता भएको जानकारी दिएका हुन् ।

समाजवादी गणतन्त्र भियतनामका प्रधानमन्त्री गुएन सुआन फुकको निमन्त्रणामा गत वैशाख २६ देखि ३० वैशाखसम्म भियतनाम र त्यसपछि कम्बोडियाका प्रधानमन्त्री सम्देह अक्का मोह सेना पडेइ टेको हुन सेनको निमन्त्रणामा कम्बोडिया भ्रमण सकेर बुधबार साँझ प्रधानमन्त्री ओली स्वदेश फर्किएका हुन् ।

कम्बोडिया भ्रमणमा रहेका बेला प्रधानमन्त्री ओली तथा उनका कम्बोडियाली समकक्षी हुन सेनले १५ बुँदे संयुक्त विज्ञप्ति जारी गरेका थिए ।
प्रधानमन्त्री ओलीले त्यहाँका प्रधानमन्त्री हुन सेनसँगको भेटवार्तापछि संयुक्त विज्ञप्ति जारी गरिएको थियो ।

उक्त भेटवार्तामा प्रधानमन्त्री ओलीले कम्बोडिया त्यस क्षेत्रमा नेपालको नजिकको मित्र तथा महत्वपूर्ण साझेदार रहेको जनाएका थिए । त्यस्तै, भेटवार्तामा कम्बोडियाली प्रधानमन्त्री सेनले गतवर्ष आफ्नो नेपाल भ्रमणको चर्चा गर्दै ओलीको कम्बोडिया भ्रमण ऐतिहासिक रहेको जनाएका थिए । भेटवार्तामा ओली र सेन बीच पर्यटन, संस्कृति, लगानी, व्यापार, शिक्षालगायतका क्षेत्रमा द्विपक्षीय साझेदारीलाई प्रवर्द्धन गर्ने विषयमा छलफल भएको थियो ।

भियतनामको ५ दिने औपचारिक भ्रमण सकेर उच्चपदस्थअधिकारी तथाव्यापारिक प्रतिनिधिमण्डलका सदस्यसहितकम्बोडिया पुगेका प्रधानमन्त्रीओलीले त्यहाँको स्वतन्त्रता स्मारकमागई माल्यार्पण गरेको तथा स्वतन्त्रता सेनानीहरुप्रति सम्मान दर्शाएका थिए ।

त्यस्तै, कम्बोडियाका पूर्व राजा तथा राष्ट्रपिता नरोदोम सिंहानुकको शालिकमा समेत माल्यार्पण गरेका थिए । प्रधानमन्त्री ओलीले सेनलाई नेपाल भ्रमणको निम्तो समेत दिएका थिए । प्रधानमन्त्री सेनाले ओलीले दिएको नेपाल भ्रमणको निम्तो स्वीकार गर्दै निकट भविष्यमा नै नेपालको भ्रमण गर्ने जनाएका थिए ।

प्रधानमन्त्री ओलीलाई स्वागत गर्न त्रिभुवन अन्तरराष्ट्रिय विमानस्थलको अतिविशिष्ट कक्षमा सभामुख कृष्णबहादुर महरा, उपप्रधानमन्त्री ईश्वर पोखरेल, गृहमन्त्री रामबहादुर थापा, नेकपा संसदीय दलका उपनेता सुवाश नेम्बाङ र उच्चपदस्थ कर्मचारी पुगेका थिए । नेपाली सेनाको ‍टोलीले सलामी दिएको थियो ।