आजका युवा पुस्ता र बालबालिकालाई बर्गर निकै मन पर्दछ । पश्चिमी मुलुकबाट सुरु भएको खाजाको परिकारका रुपमा बर्गर भेज र ननभेज दुवै फ्लेवरमा पाइन्छ ।

होटल, रेस्टुरेन्टमा खाने बर्गर घरमै पनि बनाउन सकिन्छ । बर्गर बनाउन केवल केहि सामाग्री जुटाएर यसलाई बनाउने विधी थाहा पाए घरमै सजिलै यसलाई बनाउन सकिन्छ । जुनकुनै फ्लेवरका बर्गरलाई एकै खालका सामग्रीले काम गर्छ, केवल किमा मात्रै फरक चाहिन्छ । कसरी बनाउने त बर्गर ?

सामग्री/प्रतिव्यक्ति
ब्रेड (बर्गर बन) एक पिस
चाइनिज साग एक पत्ता
गोलभेँडा स्लाइस गरेको दुई पिस
प्याज स्लाइस गरेको दुई पिस
काँक्रो स्लाइस गरेको दुई पिस
भेजिटेबल (मसिनो र लाम्चो आकारमा काटेको बन्दा, गाँजर, सिमी) सानो एक बटुका
माइनोज सस एक खाना चम्चा
मिक्स भेज चप गरेको एक बटुका
ननभेज बनाउने हो भने किमा मासु
मैदा एक चिया चम्चा
कर्नफ्लर एक चम्चा
ब्रेडकम एक चम्चा
नुन स्वादअनुसार
टेस्टिङ पाउडर स्वादअनुसार
सोया सस एक चम्चा

– बर्गर बनलाई बिचमा काटेर दुई पिस बनाएपछि फ्राइपेनमा तताउने ।
– चप गरेको मिक्स भेज, मैदा, कर्नफ्लर, बे्रडकम, नुन, टेस्टिङ पाउडर, सोया सस सबै राखेर रोटी बेल्दा आटा मोलेजस्तो गरेर राम्रोसँग मोल्ने ।
– यसलाई हातले हल्का थिचेर बर्गर बनको आकार दिने (यसलाई प्याडी भनिन्छ) र राम्रोसँग पाक्ने गरी फ्राइपेनमा फर्काई–फर्काई तताउने ।
– अब लाम्चो आकारमा चप गरेको भेजिटेबललाई माइनोज सससँग मोल्ने ।
– त्यसपछि यसलाई पनि हातले हल्का थिचेर बर्गर बनको आकार दिने ।
– बर्गर बनको एक पिस लिने र यसमाथि चाङ मिलाउँदै चाइनिज साग, काँक्रो, गाँजर, प्याज लगायत स्लाइस राख्ने ।
– योमाथि माइनो सससँग मोलेर तयार पारेको भेजिटेबल पनि चाङ मिलाएर राख्ने ।
– यसपछि प्याडी राख्ने र बर्गर बनको अर्को पिसले माथिबाट छोप्ने ।
– अब बर्गर तयार भयो ।