काठमाडौं– भूमिसुधार तथा मालपोत कार्यालय डिल्लीबजारका प्रमुख मालपोत अधिकृत (कार्यालय प्रमुख) अदालतको अवहेलनामा दोषी ठहर भएका छन् ।

उच्च अदालत पाटनले एक मुद्दाको सन्दर्भमा कागजात झिकाउने आदेश कार्यान्वयन नगरेपछि कार्यालय प्रमुख विश्वराज मरासेनी अदालतको अवहेलना मुद्दामा दोषी ठहर भएका हुन् ।

उच्च अदालत मोहम्मद साबिर हुसेन र टेकनारायण कुँवरको इजलासले मालपोत प्रमुख मरासेनीलाई अदालतको अवहेलना गरेको भन्दै ५ हजार रुपैयाँ जरिवाना तोकेको हो ।

अदालतले ६ जेठ २०७५, १८ असार २०७५, १९ असोज २०७५, ३ माघ २०७५ र ३ चैत २०७५ गरी ५ पटक डिल्लीबजार मालपोत कार्यालयलाई पत्र लेखेर कागजात माग गरेको थियो ।

पाँच–पाँच पटक पत्रचार गर्दा पनि कार्यालयबाट पत्र प्राप्त नभएपछि अदालतले प्रमुख मरासेनीलाई न्याय प्रशासन ऐनअनुसार पहिलोपटकका लागि ५ हजार रुपैयाँ जरिवाना तोकेको हो ।