जुनिचाँदे– जाजरकोटको ‘कम्युनिस्ट गाउँ’ (कम्युन)का रुपमा चर्चित जुनिचाँदेमा पहिलोपटक सरकारी अधिकारी पुगेका छन् ।

जिल्लाको जुनिचाँदे गाउँपालिकामा पहिलोपटक प्रमुख जिल्ला अधिकारी समेत सहभागितामा बृद्धद शिविर सञ्चालन गरिएको हो ।

गाउँपालिकाको प्रशासकीय केन्द्र लुहादह र जुनी बस्तीमा शिविर सञ्चालन गरिएको हो ।

प्रमुख जिल्ला अधिकारी ललितकुमार बस्नेतलगायतको सरकारी टोलीले लहादह, जुनिचाँदेलगायत ठाउँमा गएर शिविर सञ्चालन गरेको हो ।

शिविरमा ६ सय ४२ मा नागरिकता लिएका छन् । उक्त एकीकृत घुम्ती शिविरबाट ६५० जनाले फोटोसहितको मतदाता नामावली दर्ता गराएका छन् ।

शिविरमा १ हजार ९ सय ३६ भेडा/बाख्रा, २ सय ३३ गाई/गोरु, १ सय ६१ भैंसी/राँगो, १० कुकुर र २५ घोडा–खच्चड गरी जम्मा २ हजार ३७६ वटा पशुचौपायलाई विभिन्न रोगको खोप लगाइएको छ ।

त्यस्तै ५०० घरधुरी किसानलाई विभिन्न उन्नत जातको तरकारीको बीउ वितरण गरिएको गाउँपालिकाका प्रमुख प्रशासकीय अधिकृत सर्वदल शाहीले जानकारी दिए । जिल्ला सदरमुकाम खलङ्गादेखि करीब ३२ कोस टाढाको दूरीमा रहेको जुनिचाँदेको सबै वडामा उक्त शिविर भएको थियो ।

पहिलो पटक गाउँमा पुगेका सरकारी अधिकारीलाई स्थानीयवासीले प्रश्नको ओइरो लगाएका थिए । टेलिफोन, नागरिकता गाउँमा सधैँ पाइने अवस्था कहिले हुन्छ भन्दै गाउँलेले प्रश्न गरेका थिए । दैलेखको सिमानासँग जोडिएको जुनिचाँदे गाउँपालिका जिल्लाको दुर्गम स्थानीय तहमा पर्दछ ।