काठमाडौं– हाल अवरुद्ध रहेको बहुप्रतिक्षित मेलम्ची खानेपानी आयोजनाको काम अगाडि बढाउन खानेपानी तथा सरसफाइ मन्त्री बिना मगरले विशेष प्रस्ताव अगाडि बढाउने भएकी छन् ।

मन्त्री मगरले आगामी मन्त्रिपरिषदको वैठकमा विशेष प्रस्ताव पेश गर्ने बताएकी हुन् ।

बुधबार प्रतिनिसभाको विकास तथा प्रविधि समितिको वैठकमा बोल्दै मन्त्री मगरले मेलम्ची खानेपानी आयोजनाको बाँकी काम सम्पन्न गर्ने विषयमा आगामी मन्त्रिपरिषदको बैठकमा आफूले विशेष प्रस्ताव पेश गर्ने बताइन् ।

समितिको वैठकबाट मेलम्ची खानेपानी आयोजनाका काम तत्काल अगाडि बढाउन निर्देशन दिइएपछि मन्त्री मगरले आफूले आगामी मन्त्रिपरिषदको वैठकमा यसबारे विशेष प्रस्ताव पेश गर्ने बताएकी हुन् ।

मेलम्ची खानीपानी आयोजनाको मुख्य ठेकेदार इटालियन कम्पनी सीएमसी दि राभेना बीचैमा काम छाडेर मागेपछि आयोजनाको काम हाल ठप्पजस्तै छ ।

मुहानतर्फको मुख्य काम चलिरहेका बेला सीएमसीले बीचमै काम छाडेको थियो । अंग्रेजी नयाँ वर्ष २०१९ र गत वर्षको क्रिसमसको बिदा मनाउन भनेर आयोजना स्थलबाट भागेका सीएमसीका ठेकेदारहरु भागेका थिए ।

त्यसपछि सीएमसीले एकतर्फी रुपमा ठेक्का तोडेको घोषणा गरेको थियो ।

खानेपानी मन्त्री मगरले मेलम्चीमा पुनः सीएमसीलाई नै फर्काउने पहल गरिरहेको विषय सार्वजनिक भए पनि हालसम्म कुनै निर्णय सार्वजनिक भएको छैन ।

यसबीचमा मेलम्चीको समस्या समाधानका लागि आफूले विभिन्न निकायसँग छलफल गरेको जनाउँदै अवरुद्ध रहेको काम तत्काल शुरु गर्न आफूले मन्त्रिपरिषदमा विशेष प्रस्ताव पेश गर्न लागेको मन्त्री मगरको भनाइ छ ।