दोहा- बैदेशिक रोजगारीका क्रममा कुवेतमा मृत्यु भएकी एक नेपाली महिलाको शव आर्थिक सहयोग संकलन गरेर स्वदेश पठाइएको छ ।

आर्थिक अभाव हुँदा करिव दुई हप्तादेखि अलपत्र परेको मोरङको बुढीगङ्गा गाउँपालिका वडा नम्बर- ७ (डङ्ग्राहा टोल) घर भएकी द्रौपती चौधरीको शव नेपाल पठाउन समस्या भएपछि गैरआवसीय नेपाली संघ (एनआरएनए) कुवेतले आर्थिक संकलन सुरु गरेको थियो ।

एनआरएनएका उपाध्यक्ष उमेश पुडासैनीको संयोजकत्वमा एक समिति गठन गरेर आर्थिक संकलन गरी कुवेतबाट शव पठाउन लाग्ने शुल्क ३८५ केडी (नेरु करिब १ लाख ४७ हजार) त्यहाँस्थित नेपाली दूतवासलाई बुझाएपछि शव आइतबार राति नेपाल पठाइएको एनआरएनए कुवेतका अध्यक्ष रणध्वोज लामाले जानकारी दिए ।

चौधरीको शव दुई हप्ता अगाडि आफ्नै स्पोन्सरको घरमा झुन्डिएको अवस्थामा फेला परेको थियो । उनी भारतको बाटो हुँदै घरेलु कामदारको रुपमा ४ वर्षदेखि कार्यरत थिइन् ।

नेपालबाट श्रम स्वीकृति नलिई त्यहाँ पुगेकाले वैदेशीक रोजगार प्रवर्द्धन बोर्डले उनको शव नेपाल पठाउन आर्थिक सहयोग गरेको थिएन ।