काठमाडौँ– नेकपा एमालेका वरिष्ठ नेता माधवकुमार नेपालले नयाँ पार्टी बनाउने विषय बाध्यताको कुरामात्र भएको बताएका छन् ।

शनिबार काठमाडौँमा नेकपा एमाले वाग्मती प्रदेश सम्पर्क संगठन कमिटीको प्रशिक्षण कार्यक्रममा नेता नेपालले अर्को पार्टी बनाउन चाहन्छन् भन्ने नभएर बाध्यताको कुरा मात्र भएको बताएका हुन् ।

उनले अब प्रदेशदेखि तल्लो तहसम्म समानान्तर कमिटी बनाउने कामलाई तीव्र गतिमा अघि बढाइने धारणा राखे । नेता नेपालले एमालेभित्र रहेको गलत र अहंकारी प्रवृत्तिले जनविश्वास गुमेको भन्दै आफ्ना लागि मैदान खाली रहेको उल्लेख गरे ।

अपमान सहेर एकता नहुने र त्यस्तो अवस्थामा असहज बाटो लिनु बाध्यता हुने उनको भनाइ छ । उनले पार्टीको प्रत्येक घटनाक्रम हेर्दा अध्यक्ष ओलीले पार्टी विभाजन चाहेको आरोप लगाए । नेता नेपालले समाजवादको लक्ष्य बोकेको कम्युनिष्ट पार्टीले सत्तामा पुगेपछि आफ्नो जिम्मेवारी भुलेको र अवसरवादको कारण कम्युनिष्ट आन्दोलन कमजोर बन्दै गएको बताए ।

उनले एकताका लागि अत्यन्त प्रयत्न गरेका वामदेव गौतमको जस्तो अवस्था पार्टीभित्र आफूले व्यहोर्न नसक्ने स्पष्ट पारे । पार्टीभित्र ओलीले एकतर्फी रुपमा आफ्नो गतिविधि अगाडी बढाउँदै लगेको र एकताका लागि गम्भीर बन्न नसकेको आरोप पनि नेता नेपालले लगाए ।

कार्यक्रममा नेता नेपालले एमाले वाग्मती प्रदेश सम्पर्क संगठन कमिटीका सदस्यहरुलाई सपथ खुवाएका थिए ।