काठमाडौं– काठमाडौंका विभिन्न स्थानबाट मोटरसाइकल चोरी गरी पाटपूर्जा बिक्री गर्ने गिरोहका ३ जनालाई प्रहरीले पक्राउ गरेको छ ।

गत शनिबार (वैशाख २८ गते) काठमाडौंको गोकर्णेश्वर नगरपालिका–८ अत्तरखेलमा पार्किङ गरी राखिएको प्र.३–००२–००३प ८१३१ नम्बरको मोटरसाइकल चोरी भएको उजुरीका आधारमा छानबिन गर्दा प्रहरीले मोटरसाइकल चोरी गरेर पाटपूर्जा बिक्री गर्ने ३ जनालाई पक्राउ गरेको हो ।

पक्राउ पर्नेमा काठमाडौंको शंखरपुर–५ घर भइ कागेश्वर मनोहरा– १ गागलफेदीमा ग्यारेज सञ्चालन गरी बस्ने २६ वर्षीय तिलक बहादुर तामाङ, शंखरपुर–४ जर्सिङपौवा घर भएका २२ वर्षीय निराजन ओझा र गागलफेदी बस्ने १८ वर्षीय महोम्मद सजाद खान छन् ।

उनीहरुले अत्तरखेलबाट चोरी गरेको मोटरसाइकल गागलफेदीमा ल्याएर लुकाएर राखेका थिए । उक्त मोटरसाइकलबाट पाटपूर्जा झिकिएको अवस्था फेला परेको प्रहरीले जनाएको छ ।

प्रहरीका अनुसार उनीहरुले यसअघि पनि विभिन्न मोटरसाइकल चोरी गरी आफ्नै वर्कशपबाट पाटपूर्जाहरु बिक्री गर्ने गरेका थिए ।

प्रहरीले उनीहरुले सञ्चालन गरेको ग्यारेजबाट चोरीका मोटरसाइकलमा पाटपूर्जा समेत बरामद गरेको जनाएको छ ।