काठमाडौँ– ‘मानार्थ कन्सुलर संस्था, नेपाल’ को नव निर्वाचित डीनको टोलीले बुधबार राष्ट्रपति विद्यादेवी भण्डारीलाई भेटेको छ । टोली नेतृत्व नवनिर्वाचित डीन लोकमान्य गोल्छाले गरेका थिए ।

डीनले नेपाललाई कोरोना भाइरसको भ्याक्सिन र अन्य स्वास्थ्य सामग्री सहयोग गर्ने देशहरूलाई राष्ट्रपति भण्डारीका कन्सुल तथा कन्सुल जनरलहरूका तर्फबाट शुभकामना दिए ।

उक्त अवसरमा नेपाल र नेपालका लागि सहायता सामग्री पठाउने मुलुकहरू बीचको आपसी सहयोग सौहार्दपूर्ण र सहयोगी रहेको कुरा स्मरण गरिएको थियो ।

सहायता सामग्री पठाउने मुलुकहरू नेपाललाई महामारीमा र अन्य आवश्यक सहयोग गर्न इच्छुक रहेका छन् । डीनको टोलीले राष्ट्रपतिलाई मानार्थ कन्सुलर संस्थाले सहायता प्रदान गर्ने देशहरूले नेपालको अर्थतन्त्र सुदृढीकरण तथा द्विपक्षीय र बहुपक्षीय सम्बन्ध प्रवर्द्धनका लागि गरेको प्रयासका बारे जानकारी गराएको थियो ।

राष्ट्रपति भाण्डारीले विभिन्न मुलुकहरूले नेपाललाई गरेको सहयोगको सराहना गरिन् ।

राष्ट्रपति भण्डारीले ती देशहरूमा नेपाली दूतावास खोल्न सम्भव नभएको वर्तमान अवस्थामा कन्सुलरहरूको भूमिका निकै महत्वपूर्ण हुने विश्वास प्रकट गरिन् ।

राष्ट्रपतिले कन्सुलरहरूले व्यापार, आर्थिक क्षेत्र, जनस्तरको सम्बन्ध र पर्यावरण तथा जलवायुत् परिवर्तन सम्बन्धी ज्वलन्त मामलाहरूमा पनि योगदान गर्न सक्ने बताइन् ।

यसैगरी राष्ट्रपति भण्डारीले मानार्थ कन्सुलर संस्थाले द्विपक्षीय र बहुपक्षीय क्षेत्रमा सहयोग आदान–प्रदानका लागि आफ्नो दायरा अझै फराकिलो बनाउन सक्ने बताइन् ।

उनले व्यापार र पर्यटन प्रवर्द्धनसँगै पर्यावरणका मामलाहरूमा काम गर्न पनि मानार्थ कन्सुलर संस्थाका सदस्यहरूलाई आग्रह गरिन् ।