काठमाडौँ– साउन महिनाको चौथो सोमबार पनि भक्तजनहरुले पशुपतिनाथ मन्दिर पुगेर भगवान शिवको पूजाआराधना गरेका छन् ।

कोरोना महामारीका कारण मन्दिर नखुले पनि मन्दिर बाहिरै उनीहरुले पूजाआजा गरेका हुन् ।

पशुपति मन्दिर परिसरमा भक्तजनको भीड लागेको थियो । साउन महिनाको हरेक सोमबार विशेषगरी महिलाले विधिपूर्वक व्रत बसेर शिवालयमा गई पूजा आराधना गर्ने प्रचलन रहेको छ ।

साउन महिना र सोमबार भगवान शिवको महिना एवं बार भएकाले स्नान गरी शिवालयमा पूजाआजा एवं दर्शन गरेमा मनोकांक्षा पूरा हुने र अटल सौभाग्य प्राप्त हुने धार्मिक विश्वास रहेको छ ।

पशुपतिनाथ मन्दिर लगायत देशभरका शिवालयमा विशेषगरी महिला भक्तजनको भिड लाग्ने गरेकामा यसवर्ष कोभिडको जोखिम कायमै रहेकाले विगत भन्दा भक्तजनको संख्यामा भने कमी आएको थियो ।

यस वर्ष साउन ४, ११, १८, २५ र ३२ गते गरी पाँच वटा सोमबार परेको छ।