स्वीडेन– स्वीडेनले गोप्य दस्तावेज सार्वजनिक गरेर तहल्का मच्चाएको वेबसाइट विकिलिक्सका संस्थापक जुलियन असान्जमाथि लागेको यौन दुर्व्यवहारको अभियोग पुनः अघि बढाउने भएको छ ।

स्वीडेनको सार्वजनिक अभियोजनकर्ताको कार्यालयकी उपनिर्देशक एभा मरि पेर्सनले असान्जविरुद्धको अभियोग पुनः अघि बढाइने जनाएकी हुन् । यसअघि बेलायतको राजधानी लण्डनमा रहेको इक्वेडोरको राजदूतावासमा शरण लिएर बसेपछि स्वीडेनले उनीविरुद्धको अभियोग फिर्ता गरेको थियो ।

तर, अब उनी दूतावासबाट बाहिर निस्किसकेपछि उनीविरुद्धको कानूनी कारवाही अघि बढाउन मिल्ने जनाइएको छ । उनलाई अघिल्लो महिना इक्वेडोरले शरण फिर्ता लिएपछि पक्राउ गरिएको छ ।

जमानत म्याद उल्लङ्घन गरेको अभियोगमा दोषी पाइएपछि उनी हाल लण्डनको बेलमार्श जेलमा ५० साताको सजाय काटिरहेका छन् । उनलाई स्वीडेनमा सन् २०१० यता यौन दूराचारको अभियोग लाग्र्दै आएको छ ।