काठमाडौं– नेपाल चेम्बर अफ कमर्सले राजधानीमा एक कार्यक्रमको आयोजना गरी बिभिन्न मुलुकहरुमा नेपालको राजदूत नियुक्त भएका राजदूतहरुलाई राजदूतहरुलाई बधाइ तथा कार्यकाल सफलताको शुभकामना प्रदान गरेको छ ।

कार्यक्रमलाई नेपाल चेम्बर अफ कमर्सका अध्यक्ष राजेश काजी श्रेष्ठले सम्बोधन गर्दै नवनियुक्त सबै राजदुतहरुलाई बधाई तथा शुभकामना दिएका हुन् ।  ‘समृद्द नेपाल, सुखी नेपाली’को नारा पूरा गर्नको लागि देशभित्र र देश बाहिर अनुकुल वातावरण कायम गर्न सरकार लागि परेको अवस्थामा विभिन्न मूलकका नेपाली राजदूतहरुले ती देशहरुसँग कुटनीतिक सम्बन्ध मजबुत बनाउनुपर्ने बताए ।

राजदुतहरुले नेपालको राष्ट्रिय स्वार्थ पूरा गर्नलाई नेपालको ब्यापार प्रवद्र्धन, लगानी अभविद्धि, पर्यटनको विकास र कृषि क्षेत्रको आधुनिकीकरणमा बिशेष पहल गर्न समेत अपिल गरे । भारतका लागि नेपालका नव–नियुक्त राजदुत निलाम्बर आचार्यले देश समृद्द बन्नलाई उत्पादन र निर्यात बढ्नु पर्ने कुरामा जोड दिए । साथै उनले चेम्बर र राजदूतहरु महत्वपूर्ण साझेदार भएको कुरा समेत उल्लेख गरे ।

चेम्बरले बिश्वब्यापी रुपमा नेपालमा बन्दै गएको लगानीमैत्री वातावरणको प्रचार गर्नुपर्ने कुरा उल्लेल्ख गरे । मलेसियाका लागि नेपाली राजदुत उदयराज पाण्डेले नेपाली उद्योगीहरु व्यापारी मात्र नभै उत्पादनकर्ता समेत भएको कुरामा जोड दिए । इजरायलका लागि नेपाली राजदुत डा. अन्जान शाक्यले लगानीकर्ता भित्र्याउन आफुले सक्दो पहल गर्ने बताइन् । उनले आफू नेपाली महिला व्यवसायीहरु र इजराइलका महिला व्यवसायीहरुको बिचमा सम्बन्ध स्थापित गर्न प्रयासरत रहने व्यक्त गरिन् ।

त्यसैगरी संयुक्त राष्ट्रसंघका लागि नेपाली प्रतिनिधि अमृत राईले सन् २०२२ सम्ममा अति कम वकिसित राष्ट्रबाट विकासशील राष्ट्रमा स्तरोन्नति हुन र सन् २०३० सम्ममा मध्यम आय भएको राष्ट्र बन्न नेपालले आफ्नो ब्यापारमा सुधार गर्नु पर्ने कुरा उल्लेख गरे ।

कर्यक्रममा संयुक्त अरब इमिरेट्सको लागि नेपाली राजदूत कृष्ण प्रसाद ढकाल, थाईल्याण्डका लागि नेपाली राजदुत गणेश ढकाल, स्वीटजरल्याण्डका लागि नेपाली राजदूत मणि भट्टराई, फ्रान्सका लागि नेपाली राजदूत दीपक अधिकारी र कुवेतका लागि नेपाली राजदूत दुर्गा शर्माले आफूहरुले आफ्नो कार्यकालभरि समृद्द नेपाल सुखी नेपाली को नारालाई सार्थक तुल्याउन लाग्ने बताए ।