जनकपुरधाम– धनुषा प्रहरीको हिरासतमा मृत्यु भएका लक्ष्मीनियाँ गाउँपालका २ सिनुरजोडाका पल्टु रविदासको शव आफन्तले बुझेका छन् । सरकार र परिवारका सदस्यबीच दुई बुँदे सहमतिपछि शव बुझेका हुन् ।

घटनाको पाँच दिनपछि दुई बुँदे सहमति भएको हो । जिल्ला सुरक्षा समितिको बैठकमा सहमति भएपछि परिवारले शव बुझेको धनुषाका प्रमुख जिल्ला अधिकारी बन्धु प्रसाद बास्तोलाले बताए ।

उनका अनुसार उच्च स्तरीय छानविन समिति गठन गरी छानविन गरिने र मृतक परिवारलाई राहतको प्रदान गर्ने सहमति भएको छ ।

जिल्ला सुरक्षा समितिको बैठकमा लक्ष्मीनियाँ गाउँपालिकाका अध्यक्ष विन्देश्वर यादवले मृतकको श्रीमतीलाई जागिर दिने प्रतिबद्धता जनाएका छन् । मृतक परिवाले भने संघीय सरकारबाट दश लाख र प्रदेशबाट ५ लाख रकम राहत माग दावी गर्दै आएका थिए ।

प्रदेश प्रहरी प्रमुख (डिआजी) उमेश रञ्जितकारले ड्यूटीमा खटिएका सेन्ट्रीलाई छानविनको लागि निलम्बन गरिएको बताए । धनुषाका प्रहरी नायव उपरीक्षक मकेन्द्र मिश्रलाई प्रदेशमा तानिएको उनले बताए ।

गत साउन १५ गते थुनुवा कक्षको शौचालयमा झुण्डिएको अवस्थामा पल्टु रविदासको शव फेला परेको थियो ।