काठमाडौँ– गृहमन्त्री बालकृष्ण खाँणले दार्चुलामा नेपाली युवा चढेको तुइन काटेको घटना सम्बन्धमा छानविन गर्न गठित समितिको प्रतिवेदनका आधारमा सरकारले धारणा बनाउने बताएका छन् ।

राष्ट्रिय सभाको सोमबारको बैठकमा बोल्दै मन्त्री खाँणले दार्चुला घटनामा सरकार गम्भीर भएकै कारण छानविन समिति बनाइएको बताए ।

उनले समितिको अध्ययन प्रतिवेदनका आधारमा सरकारले आवश्यक अडान लिने धारणा राखे । समिति गठन भइसकेको अवस्थामा यस विषयमा सरकारले अहिले नै धारणा तय गर्नु उचित नभएको उनको भनाइ छ । उनले घटनाको प्रत्यक्षदर्शीसंग पनि कुराकानी भइरहेको बताए । गृहमन्त्री खाँणले महाकाली नदीमा झोलुङ्गे पुल बन्ने काम शुरू भइसकेको पनि जानकारी दिए ।

त्यस्तै उनले मनसुन यता प्राकृतिक प्रकोपबाट विभिन्न ५५ जिल्लामा ६७ जनाको मृत्यु र ४० जना वेपत्ता भएको जानकारी दिए । बाढीबाट भएको क्षतिको मूल्याङ्कन गरी पुन: निर्माणको काम शुरु गर्न निर्देशन दिइसकेको उनले बताए । उनले प्राकृतिक विपतसँग सामना गर्दै जनताको जीवन रक्षा गर्न सरकार प्रतिवद्ध रहेको बताए ।

बैठकमा सांसदहरुले तुइन काटिएको घटना सम्बन्धमा भारत सरकारसँग छलफल गर्न सरकारले ढिलाइ गरेको आरोप लगाएका थिए । एमालेका भैरव सुन्दर श्रेष्ठले एसएसबीले तुइनको लठ्ठा काटेको भनेर प्रत्यक्षदर्शीले बताउँदा भारतसँग कुरा गर्न किन तयार नभएको भनी प्रश्न गरे । त्यस्तै सांसद कोमल वलीले तुइन काटेर जयसिंह धामी नदीमा खसेको मानवीयता विरोधी र लज्जास्पद घटनामा सरकार समिति बनाएर मात्र बस्न नमिल्ने तर्क गरे ।

त्यस्तै बैठकमा गृहमन्त्री खाँणले जिल्ला प्रहरी कार्यालय धनुषाको हिरासतमा मृत्यु भएका रवि दासको विषयमा पनि आवश्यक अनुसन्धान भइरहको जानकारी गराए । उनले रवि दासले आफूले लगाउने गञ्जी च्यातेर पासो बनाई भेन्टिलेसनमा झुण्डिएको अवस्थामा फेला परेको जानकारी आफूसमक्ष आएको पनि बताए ।