काठमाडौँ– पूर्वमन्त्री उमाशंकर अरगरियाले पशुपतिनाथ मन्दिरमा पूजाआराधना गरी वाग्मती नदीमा दूध अर्पण गरेका छन् । साउने सोमबारको अवसर पारेर मन्त्री अरगरियाले पशुपतिनाथ मन्दिरमा पूजाआजा गरी वाग्मती नदीमा दूध अर्पण गरेका हुन् ।

नेपाल फाउण्डेशनका अध्यक्ष विकाशकुमार ठाकुरको संयोजनमा मन्त्री अरगरिया, राजनीतिक विश्लेषक देवेश झा लगायत हिन्दूवादी युवा तथा महिलाहरुले पशुपति मन्दिरमा पूजाआजा गरेका हुन् ।

धर्मगुरु एवं उत्तर प्रदेशका मुख्यमन्त्री योगी आदित्यनाले केही दिन अघि गंगामा दूध अर्पण गरेको विषयलाई अन्धविश्वाससँग जोडेर पूर्वप्रधानमन्त्री बाबुराम भट्टराईले हिन्दू धर्मावलम्वीहरुको भावनामा चोट पुर्‍याउने गरी टिप्पणी गरेका बेला पूर्वमन्त्री अरगरिया लगायत हिन्दूवादी युवाहरुले वाग्मती नदीमा दूध अर्पण गरेका हुन् ।

वाग्मतीमा दूध अर्पण गर्ने कार्यक्रममा पूर्वमन्त्री अरगरिया, फाउण्डेशनका अध्यक्ष ठाकुर लगायतले पूर्वप्रधानमन्त्री भट्टराई हिन्दू विरोधी गतिविधिमा लागेको भन्दै आलोचना गरेका थिए ।

‘तिथि अनुसार आज श्रावण महिनाको सोमबार बाबा पशुपतिनाथलाई स्मरण गर्दै सनातन विधिले पूजा पाठ गर्दै वाग्मती नदीमा दूध अर्पण गरेका छौ,’ अध्यक्ष ठाकुरले भने, ‘हाम्रो सनातन धर्म विरोधी गतिविधि नगर्न डा भट्टराईलाई चेतावनी दिन्छौँ । सनातन धर्ममाथिको आक्रमण सैह्य हुने छैन ।’

योगी आदित्यनाले केही दिन अघि गंगामा दूध अर्पण गर्दै गरेको तस्वीर ट्वीटरमा शेयर गरेर बाबुरामले अन्धविश्वासले दूध बगाउने र गहुँत खान बाध्य पारेको भन्दै हिन्दूको आस्थामाथि नै चोट पुर्‍याउने गरेको उनीहरुले आरोप लगाएका छन् । उनको उक्त कदमको चौतर्फी आलोचना समेत भएको थियो ।

डा. भट्टराइको उक्त ‘हर्कत’को राप्रपा अध्यक्ष कमल थापा, नेपाली कांग्रेसका वरिष्ठ नेता रामचन्द्र पौडेल, भारतीय जनता पार्टी नेता विजय चौथाइवाला लगायतले सामाजिक सञ्जालमार्फत विरोध जनाएका थिए ।