काठमाडौँ– पछिल्लो समय राजनीतिक भेटवार्तामा सक्रिय नेपाल कम्युनिस्ट पार्टीका महासचिव नेत्रविक्रम चन्द विप्लवले पूर्व माओवादी नेता रामबहादुर थापा बादलसँग भेटवार्ता गरेका छन् ।

माओवादी छाडेर नेकपा एमालेका नेता बनेका बादललाई उनकै निवास पुगेर विप्लवले भेट गरेका हुन् ।

भेटमा विप्लव समूहका नेताहरु खड्गबहादुर विश्वकर्मा र सन्तोष बुढामगर पनि सहभागी थिए ।

उनीहरुबीच भएको कुराकानीको विषय सार्वजनिक गरिएको छैन । बादल र विप्लव विगतमा सँगै सशस्त्र युद्धमा सहभागी थिए । तत्कालीन नेकपा माओवादीबाट मोहन वैद्य समूह अलग हुँदा बादल र विप्लव दुवैले वैद्यलाई साथ दिएका थिए ।

तर त्यसको एक वर्ष नपुग्दै विप्लवले अर्को पार्टी गठन गरेर गए भने बादल नेकपा माओवादी केन्द्रमा फर्किएका थिए । ओली नेतृत्वको सरकारमा गृहमन्त्री बनेका बादल अदालतको आदेशले पूर्व माओवादी र पूर्व एमाले ब्युँतिएसँगै माओवादी छाडेर एमालेमा गएका थिए ।

विप्लवले यसअघि आजै जसपाका अध्यक्ष महन्थ ठाकुरसँग पनि भेटवार्ता गरेका थिए ।