वीरगन्ज– पर्सा जिल्लाका स्थानीय तहले विपद तथा दैवी प्रकोपटका घटनासँग जुध्न एक–आपसमा सहकार्य गर्ने निर्णय गरेका छन् । साथै प्राकृति स्रोत साधनको प्रयोग र वितरणमा पनि विवाद नहुने गरी अगाडि बढ्ने पर्साका स्थानीय तहले समझदारी गरेका छन् ।

वीरगन्जमा सम्पन्न स्थानीय तहहरुको समन्वय वैठकमा सुरक्षा व्यवस्थापन र अपराध नियन्त्रणका लागि समेत स्थानीय प्रशासनसँग मिलेर सहकार्य गर्ने स्थानीय तहका प्रमुखहरुबीच सहमति जुटेको छ ।

स्थानीय सरकार सञ्चालन ऐन २०७४ को दफा २६ मा उल्लेखित ‘स्थानीय तहहरुले साझेदारी वा संयुक्त व्यवस्थापनमा कार्य गर्न सक्ने’ व्यवस्थाअनुसार पर्साका स्थानीय तहले एक–आपसमा सहकार्य गर्ने निर्णय गरेका हुन् ।

स्थानीय तहबीच हुने सहकार्यका लागि क्षेत्रहरुको पहिचान गरिएको वीरगञ्ज महानगरपालिकाका प्रमुख विजय कुमार सरावगीले जानकारी दिए ।

पर्सा जिल्लामा रहेका विभिन्न राजनैतिक चुनौती तथा साझा विकास लगायत विभिन्न मुद्दाहरुमा एकजुट भएर अगाडि बढ्ने स्थानीय तहका प्रमुखहरुबीच समझदारी बनेको छ ।