काठमाडौँ– संघीय संसदका दुवै सदनको बैठक शुक्रबार बस्दैछ । प्रतिनिधिसभा र राष्ट्रिय सभाको छुट्टाछुट्टै बैठक दिउँसो एक बजेका लागि बोलाइएको हो ।

संघीय संसद सचिवालयकाअनुसार प्रतिनिधिसभाको शुक्रबारको बैठकमा विभिन्न दलका नेताहरुले प्रधानमन्त्री शेरबहादुर देउवाको कार्यकाल सफलताको शुभकामनासहित मन्तव्य राख्ने कार्यसूची छ । गत साउन ३ गते शुरू भएको प्रतिनिधिसभाको आठौँ अधिवेशनको पहिलो दिन नै प्रधानमन्त्री देउवालाई विश्वासको मत प्राप्त भएको थियो ।

यस्तै राज्य व्यवस्था तथा सुशासन समितिका सभापति शशी श्रेष्ठले कारागार विधेयक सम्बन्धी समितिको प्रतिवेदन पेश गर्नुका साथै सरकारले महालेखा परीक्षकको वार्षिक प्रतिवेदन पेश गर्ने सम्भावित कार्यसूची सचिवालयले सार्वजनिक गरेको छ ।

राष्ट्रिय सभामा समेत पछिल्लो राजनीतिक घटनाक्रमबारे सदस्यहरुले धारणा राख्ने तयारी भएको सचिवालयले जनाएको छ ।

सरकारले शुक्रबारको बैठकमा राष्ट्रिय मावअधिकार आयोगको वार्षिक प्रतिवेदन टेबल गर्ने कार्यसूची छ ।