काठमाडौं-१२ औं संस्करणको इन्डियन प्रिमियर लिग (आईपीएल) क्रिकेटमा सहभागीता जनाएका नेपाली राष्ट्रिय टोलीका लेग स्पिनर सन्दीप लामिछाने आज (आइतबार) स्वदेश फर्कदै छन्।

उनी एयर इण्डियाको विमानबाट दिउँसो २ : ३५ बजे काठमाडौं आईपुग्नेछन् ।

आईपीएलमा सन्दीपको टोली दिल्ली क्यापिटल्स दोस्रो क्वालिफायर्समा चेन्नई सुपर किङसँग पराजित हुँदै बाहिरिएको थियो। शुक्रबार दिल्ली प्रतियोगिताबाट बाहिरिएपछि सन्दीप आज नेपाल फर्कन लागेका हुन् ।

दिल्लीका १६ मध्ये ६ खेल खेल्ने मौका पाएका सन्दीपले ८ विकेट लिएका थिए । उनले २३ ओभर बलिङ गर्दा २ सय १० रन खर्चेर ८ विकेट लिएका थिए ।

दिल्लीको तेस्रो, चौथो, पाँचौं र छैटौं खेलमा लगातार स्थान बनाएका सन्दीपले त्यसपछि भने दिल्लीले १० खेल खेल्दा दुई खेलमा मात्रै स्थान पाए ।