एजेन्सी– अमेरिकी अखबार फोर्बसको अर्बपतिको सूचीमा १३ औं नम्बरमा आउने भारतीय धनाढ्य मुकेश अम्बानीले ८ करोड ८० लाख अमेरिकी डलरमा अढाई शताब्दी भन्दा पुरानो खेलौनाको व्यवसाय खरिद गरेका छन् ।

मुकेश अम्बानीले बेलायतमा रहेको २५९ वर्ष पुरानो ह्याम्लिज खेलौना पसल ८ करोड ८० लाख डलर (९ अर्ब ८३ करोड ४४ लाख ४० हजार नेपाली रुपैयाँ) मा खरिद गरेका हुन् ।

हङकङगमा रहेको चिनियाँ फेसन समूह सी. ब्यानर इन्टरनेशनल होल्डिङग्ससँग ८ करोड ८० लाख अमेरिकी डलर बराबरमा खरिद सम्झौता भएको अम्बानीको रिलायन्स ब्राण्डले घोषणा गरेको छ । यससँगै अब ह्यम्लिजका विश्वका १८ मुलुकमा रहेका १६७ स्टोर रिलायन्स कम्पनीको स्वामित्वमा आएको छ ।

सन् १७६० मा स्थापना भएको ह्याम्लिज खुद्रा पसल विश्वको सबैभन्दा पुरानो तथा निकै महत्वपूर्णमध्येको खेलौना पसल एक हो ।

पछिल्लो समयमा ह्याम्लिज घाटामा गएका कारण सी. ब्यानरले आफूले यसअघि खरिद गरेको भन्दा झण्डै आधा रकमममा रिलायन्सलाई बेच्न बाध्य भएको जनाइएको छ ।

बेलायतको राजधानी लण्डनमा रहेको पर्यटकीय रेजेण्ट स्ट्रिटमा अवस्थित ह्याम्लिजको मुख्य वितरण केन्द्रमा मात्रै वार्षिक ५० लाख पर्यटकहरु आउने गरेको बताइन्छ ।