काठमाडौं– चेन्नेई सुपर किंग्स इन्डियन प्रिमियर लिग क्रिकेट (आईपीएल)को फाईनल प्रवेश गरेको छ । हिजो (शुक्रबार) राति भएको दोस्रो क्वालिफायर खेलमा दिल्ली क्यापिटल्सलाई पराजित गर्दै चेन्नेईले फाइनलको यात्रा तय गरेको हो । अब उपाधीका लागि चेन्नेईले मुम्बईको सामना गर्नेछ ।

१ सय ४८ रनको लक्ष्य चेन्नेईले १ ओभर बाँकी छँदै ४ विकेट गुमाएर पुरा गर्‍यो । चेन्नेईको जीतका लागि ओपनर फाफ डु प्लेसिस र सेन वटसनले अर्धशतक बनाए । दुवैले पहिलो विकेटका लागि ८१ रनको साझेदारी गरेका थिए । सुरेश रैना ११ रन बनाएर आउट भएका थिए ।

यसअघि, विशाखापटनममा चेन्नेईले टस जितेर फिल्डिङ रोजेपछि ब्याटिङमा उत्रिएको दिल्लीले निर्धा्रित ओभरमा ९ विकेट गुमाएर १ सय ४७ रन बनाएको थियो । दिल्लीका लागि ऋषभ पन्तले ३८ र कोलिन मुन्रोले २७ रन जोड्नु बाहेक अन्यको प्रर्दशन त्यति राम्रो भएन ।

ओपनर पृथ्वी शा ५ र शिखर धवन ८ रनका आउट भए । कप्तान श्रेयश लेयरले १३ रन मात्र जोडे ।