काठमाडौँ- जनता समाजवादी पार्टी(जसपा) ले केन्द्रीय कार्यकारिणी र सांसदहरुको बैठक बोलाएको छ।

जसपाको उपेन्द्र यादव-डा बाबुराम भट्टराईपक्षले आज दिउँसोलाई केन्द्रीय कार्यालयमा बैठक बोलाएको उक्त पक्षका एक नेताले जानकारी दिए।

सर्वोच्च अदालतले सोमबार संसद पुन: स्थापना गर्दै नेपाली कांग्रेसका सभापति शेरबहादुर देउवालाई प्रधानमन्त्री नियुक्त गर्न राष्ट्रपतिलाई परमादेश जारी गरेपछि विकसित घटनाक्रमबारे छलफल गर्न बैठक बस्न लागेको हो।

आजै कांग्रेस सभापति देउवाको शपथ हुने र सानो आकारको मन्त्रिपरिषद् बनाउनेबारे पाँच दलीय गठबन्धनमा छलफल भएसँगै जसपाले सरकारमा सहभागिताको बारेमा आजको बैठकबाट निर्णय गर्ने ती नेताले जानकारी दिए।

कांग्रेससहितको गठबन्धनमा जसपाको उपेन्द्र-बाबुरामपक्ष रहेको छ।

उपेन्द्र- बाबुरामपक्षमा जसपाका १२ सांसद रहेका छन्। अर्का अध्यक्ष महन्थ ठाकुर पक्षमा रहेका केही सांसद आफूहरुतर्फ आउनसक्ने आकलन उपेन्द्रपक्षले गरेको छ।

ठाकुरपक्ष भने संसद विघटनपछि प्रधानमन्त्री केपी शर्मा ओलीलाई साथ दिँदै सरकारमा सहभागी भएको थियो तर सर्वोच्च अदालतले कामचलाउ सरकारले मन्त्री थप गर्न नपाउने भन्दै उनीहरुलाई पदमुक्त गरिदिएको थियो।