काठमाडौं – नेपाली राष्ट्रिय महिला फुटबल टोलीकी स्टाइकर सावित्रा भण्डारीले भारतीय महिला लिगमा सेथु एफसीको तेस्रो खेलमा पनि गोेल गरेकी छन् । शुक्रबार बिहान भएको खेलमा सेथुले साई एसटीसी काट्टेक फुटबल क्लबलाई ९–० गोल अन्तर हराउँदा उनले एक गोल गरिन् ।

सावित्रा खेलमा बैकल्पिक खेलाडीको रुपमा मैदान उत्रेकी थिइन् । खेलको तेस्रो मिनेटमा ग्रेसको क्रसमा रतनवालाले हेड गोल गर्दै सेथुलाई अग्रता दिलाएकी थिइन् । आठौं मिनेटमा ग्रेसीकै क्रममा गोलकिपरले गल्ती गर्दा सन्ध्याले गोल गर्दै सेथुुको अग्रतालाई दोब्बर पारिन् ।

२८ औ मिनेटमा व्यक्तिगत दोस्रो गोल गर्दै रतनवालाले टिमलाई ३–० को स्थितिमा पुर्याइन् । इन्दुमतीले ३६ औ मिनेटमा सेथुका लागि चौथो गोल गरिन् ।

ग्रेसले ६९ औ मिनेटमा गोल गर्दै सेथुलाई ५–० को अवस्थामा पुर्याइन् । ७४ औ मिनेटमा रतनवालाले ह्याट्रिक पुरा गर्दा सेथु ६–० ले अगाडी रह्यो । ८२ औ मिनेटमा ग्रसीको क्रसलाई सदुपयोग गर्दै नेपाली फरवार्ड सावित्राले गोल गरिन् । उनले लिगमा गोल संख्या ६ पु्र्‍याईन् ।

खेल केहि मिनेटमात्रै बाँकी रहँदा सन्ध्याले व्यक्तिगत दोस्रो गोल गरिन् । ८९ औ मिनेटमा रतनवालाले व्यक्तिगत चौथो गोल गर्दै सेथुलाई ९–० को जित दिलाईन् । सेथुले लिगमा तीन खेल लगातार जितेको छ । लिगमा सेथुले ९ अंक जोडेको छ ।